Shpërthejnë golat në javën e parafundit. Skuadrat që edhe kanë vuajtur gjithë sezonin për të gjetur rrjetën, nuk janë kursyer aspak në metrat e fundit të kampionatit. Gara për t’i shpëtuar rënies dhe ajo për “Këpucën e Artë” prodhoi 27 gola. Deri këtu nuk ka ndonjë gjë të çuditshme, por ajo që tërheq vëmendjen vjen nga “pokerat”, tripletat dhe dopietat personale të sulmuesve.
Tashmë kanë mbetur shumë pak dilema për t’u zgjidhur. Bylisi zyrtarisht u shpall kampion, Erzeni preu “biletën” e dytë për në elitë dhe Butrinti zyrtarisht ra në Kategorinë e Dytë. Verdiktet u shoqëruan me akuza, dhe sidomos nga pala sarandjote, që dyshon për komplot ndaj tyre. 90 minutat e fundit kanë vlerë tashmë për vendin e 6-të që shkon në fazën “play off” dhe dy vendet që do të luajnë në “play out”… Erzeni prek elitën pas 19 vitesh mungesë.
Fitorja 1-4 përballë Vorës solli festën e madhe. “Shou” i Mehmetit me tre gola dhe një rrjetë e të zakonshmit Raboshta ngjitën matematikisht shijakasit në Kategorinë Superiore. Shumë diskutim hapi ndeshja në “Adush Muça”. Bylisit i duhej vetëm një pikë për të fituar titullin, por i mori që të tria.
Mundi 4-3 Butrintin, që kthehet andej nga erdhi. Edhe pse Buxhelaj dhe dopio-Onuh dhanë shpresë për një barazim, vendimtar u bë “pokeri” personal i Qardakut. Në fund nuk u kursye trajneri Adriatik Faslliu, që deklaronte: “Na rrëzuan dallaveraxhinjtë. Ne nuk harrojmë, do t’ua kthejmë reston…”.
View this post on Instagram
Dhe në fakt këtë fundjavë ata presin pikërisht Turbinën në “Andon Lapa”, ekip që shpreson të shmangë ndeshjet shtesë. Cërrikasit mundën Tomorin me të njëjtin rezultat si ai i Ballshit. Pas 50 minutave shterpësi, në “Nexhip Trungu” u bënë plot 7 gola. Tripleta e Hasajt dhe rrjeta e Veriut i dhanë trepikëshin që evitoi rënien direkte, ndërsa beratasit iu gëzuan tre golave të Oshafit. E megjithatë, futën veten në siklet.
Me Burrelin vetëm 2 pikë më pak, zona “play off” është në rrezik. Ia doli edhe Pogradeci me Tërbunin. Mjaftoi ajo rrjetë e Brahjes dhe liqenorët morën fitoren që deshën dhe i la përfundimisht jashtë zonës së kuqe, ndërsa pukjanët mbetën të 5-ët në tabelë. Besa komplikon gjithçka me atë humbje në Lezhë. Besëlidhja e mposhti me shifrat 2-1 dhe tani kavajasit diskutojnë qëndrimin në kategori. Korabi u tregua cinik përballë Maliqit.
Një perlë e Sokol Mziut dha fitoren dhe blindimin e vendit të tretë, që e mbajnë prej javësh të tëra. Edhe Burreli u kursye me skuadrën tjetër që ka rënë nga kategoria, Shkumbinin. U desh dygolëshi i Kryemadhit për të mbajtur gjallë shpresat për të parakaluar Tomorin. Një hap të madh drejt qëndrimit në kategori e hodhi Lushnja, që likuidoi në “Roza Haxhiu” Apoloninë. Ishte Canka që bëri heroin dhe i konfirmoi verdhejeshilët të pakalueshëm në shtëpi.
Arena e Lajmit
