Titulli është 7 pikë larg, por Interi mezi pret ga bimin e kushërinjve. Ndërkohë, Milani përveçse kryesuesi me moshën mesatare më të re (25.7 vjeç) mund të bëhej gjithashtu kampioni më i ri që kur fitorja në Serinë A vlen tri pikë (sezoni 1994- ’95). Frytet e punës po shihen në fushë, por edhe jashtë saj.
Fillesa janë rrogat. Borderoja kuqezi vlen 175 milionë euro (65 milionë nga kjo shumë taksat), ndërsa ajo e zikaltërve 260 milionë (110 mln taksat). Edhe skuadra e Piolit ka një vlerë tjetër në treg. Duke marrë parasysh lojtarët nën 25 vjeç, vlera e tyre në krahasim me 2021-shin është rritur me 135 milionë euro.
VLERAT – Shembulli më i mirë i këtij rivlerësimi është Rafael Leao që në gusht 2021 kushtonte 30 milionë euro e tashmë vlen të paktën dyfishin. Pas tij vjen Sandro Tonali që në verë u pagua 20 milionë euro, ndërsa në 9 muaj distancë, sipas “La Gazzetta dello Sport”, nuk mund të blihet për më pak se 50 milionë. Ismael Benaser blihej dy vjet më parë për 16 milionë euro, teksa për t’ia marrë Milanit sot nevojiten 50 milionë siç parashikohet në klauzolën e kontratës së algjerianit që skadon në qershor të vitit 2024.
TË TJERËT – Edhe Frenk Kesi bazohet pak a shumë në të njëjtat shifra. Mëkat për “Djallin” që nuk mund të fitojë nga shitja e tij, duke qenë se afrikani do të shkojë falas te Barcelona pasi nuk pranoi kurrë të rinovonte. Po Teo Hernandez? I paguar 20 milionë euro në verën e 2019-ës, sot vlen të paktën 60 milionë euro.
Davide Kalabria ka parë rritjen e çmimit të tij në treg nga 20 në 30 milionë euro; e njëjta gjë vlen edhe për Pier Kalulunë, i cili ka shkuar nga 10 në 25. Dy talente pa kosto (njëri nga akademia, tjetri nga Olimpiku i Lionit). Si çift pra, vlera e tyre është rritur me 55 milionë euro! Së fundmi, Fikajo Tomori, mbrojtësi anglez, i është paguar Çelsit, mes huazimit dhe të drejtës së blerje, 29 milionë euro. Sot ai vlen të paktën 45.
Përgatiti: REINOLD BAKALLI – Arena e Lajmit
and then