Policia e Durrësit ka vënë në pranga një 31- vjeçar për shkak se në lokalin në pronësi të tij, gjatë një kontrolli është gjetur një sasi kafeje e dyshuar e kontrabanduar, një sasi lënde e dyshuar narkotike marijuanë dhe kokainë si dhe pajisje që gjenerojnë kriptomonedha (Bitcoin).
Policia bën me dije se shtetasi me inicialet A. K., 31 vjeç, banues në Durrës, akuzohet për veprat penale “Përshtatja e lokalit për përdorim droge”, “Prodhimi dhe shitja e narkotikëve”, “Fshehja e të ardhurave”, “Kontrabanda me mallra për të cilat paguhet akcizë”, “Ruajtja apo depozitimi i mallrave kontrabandë”, si dhe “Prodhimi, mbajtja, blerja apo shitja pa leje e armëve të ftohta”.
Shërbimet e Policisë, gjatë kontrollit të ushtruar në lokalin në pronësi të shtetasit A. K., në lagjen nr. 4 Durrës, gjetën dhe sekuestruan në cilësinë e provës materiale, rreth 260 gr lëndë të dyshuar narkotike marijuanë, 18 pajisje që shërbejnë për gjenerimin e kundërligjshëm të kriptomonedhave, sasi kafeje të dyshuar të kontrabanduar, një sasi të vogël lëndë të dyshuar narkotike kokainë, 3 peshore elektronike dhe një shkop bejsbolli.
Policia bën me dije se vijon puna për dokumentimin e plotë të veprimtarisë kriminale të këtij shtetasi.
Arena e Lajmit
and then