Thomas Strakosha ka luajtur sot ndeshjen e tij të fundit me fanellën e Lacios. Portieri i përfaqësueses shqiptare ka vendosur të mos rinovojë dhe do të nisë një karrierë të re larg bardhekaltërve, me mediat italiane që flasin për një akord të arritur me Fullhem në Premier Ligë. Ndaj klubi dhe tifozët vendosën që t’i jepnin lamtumirën në mënyrën e duhur portierit shqiptar pas ndeshjes së fundit.
Me mbylljen e sfidës kundër Veronës, që përfundoi me shifrat 3-3, skuadra e Lacios bëri si zakonisht xhiron e fushës për të përshëndetur tifozët në mbyllje të edicionit ku siguruan vendin e 5-të në Serinë A. Gjatë kësaj xhiroje, tifozët thirrën në kor disa herë emrin e Strakoshës për ta falënderuar për kontributin e tij në këto vite.
Ndërsa më pas, klubi organizoi një mini-ceremoni ku presidenti Lotito i bëri dhuratë atij dhe Lukas Leiva, i cili gjithashtu do të largohet, një fanellë përkujtimore speciale ku ishin të vendosur edhe trofetë që ka fituar gjatë karrierës së tij me bardhekaltrit.
Arena e Lajmit
Loading…
and then