Ministrat e Bujqësisë mblidhen në Samitin e Ohrit/ Volumi tregtar mes Shqipërisë, RMV dhe Malit të Zi rritet në 57 milionë euro

Samiti dyditor në Ohër i nismës rajonale të Ballkanit të Hapur ka mbledhur në një tryezë ministrat e Bujqësisë së Shqipërisë, Maqedonisë së Veriut dhe Malit të Zi.

Në raundin e tretë të takimeve teknike, ministrja e Bujqësisë dhe Zhvillimit Rural, Frida Krifca konstatoi progresin e bërë në zbatimin e marrëveshjes së nënshkruar në dhjetor të vitit të kaluar.

“Marrëveshja e Ballkanit të Hapur po tregon përditë përfitimet e ndërsjella ekonomike dhe njerëzore për Shqipërinë, Maqedoninë e Veriut dhe Serbinë. Në 4 muajt e parë të vitit 2022, volumi tregtar mes tre vendeve tona është rritur me 70% duke arritur në mbi 57 milionë euro nga 33 milionë euro që ishte në katër mujorin e parë 2021”, tha ministrja Krifca në fjalën e saj.

Përkatësisht Shqipëria ka 63% rritje te eksporteve me Serbinë dhe 8% rritje te eksporteve bujqësore me Maqedoninë e Veriut ne këtë periudhe krahasimore.

Pas marrëveshjes së arritur në fund të vitit kaluar, takimet mes grupeve teknike të tre palëve janë zhvilluar në mënyrë intensive dhe samiti i Ohrit është një tjetër hap drejt konsolidimit dhe fuqizimit të tregut unik ballkanik.

Ministrja e Bujqësisë, Frida Krifca bashkë me ministrin Ljupcho Nikolovski dhe ministrin Branislav Nedimović si dhe me stafet teknike të secilit shtet, diskutuan mbi mënyrat për të monitoruar cilësisht eksportet, lehtësuar edhe më shumë procedurat për bizneset, eliminimin total të kohës së pritjes në kufij si dhe parandalimin e barrierave jo tarifore.

“Si ministër që përfaqëson Shqipërinë vë re me kënaqësi progresin e bërë në implementimin e marrëveshjes i cili vihet re në shifrat e sasisë dhe vëllimit të shkëmbimit tregtar mes vendeve tona, respektivisht Maqedonia e Veriut dhe Serbia, duke treguar gjithashtu përputhshmëritë që ekzistojnë mes nesh në sektorin bujqësor. Siç ndava me ju, Ministër Nikolovski, pak javë më parë në takimin tonë në Tiranë, secili nga ne, si Ministër i Bujqësisë, e kupton detyrën e thjeshtë që ka marrë nga Kryeministri, e cila është që të jemi personalisht të angazhuar për t’u siguruar që kjo marrëveshje të implementohet plotësisht në praktikë”, tha më tej ministrja Krifca.

Arena e Lajmit