Familja e 18-vjeçarit Anri Kashniku, i cili u mbyt dje në Durrës pasi shpëtoi nga dallgët vëllain e tij të mitur dhe një shok të tij, ka hapur dyert e mortit.
Banorët e zonës ku jeton familja e të riut dhe të afërm i janë drejtuar banesës së familjes Kashniku për të shprehur ngushëllimet e tyre dhe në prononcim për gazetaren Klodiana Haxhiaj kanë rrëfyer detaje si ka ndodhur ngjarja.
18-vjeçari ishte i angazhuar në aktivitete sportive, pasi stërvitej me ekipin dytë të Teutës së Durrësit. Të gjithë fqinjët e konsiderojnë atë hero për aktin që ka kryer, duke shpëtuar nga mbytja vëllain e tij 13-vjeçar dhe shokun e ngushtë, që është komshi i tij.
Nga dëshmia e një fqinje mësohet se Anri Kashniku sapo kishte përfunduar arsimin e mesëm, teksa pak ditë më parë kishte festuar mbrëmjen e maturës.
“Ka bërë një heroizëm shumë të madh. Ka shpëtuar vëllain e vetë dhe një djalë tjetër, që është një djalë i vetëm, s’ka as vëlla as motër”, shprehet një fqinje e familjes Kashniku.
Ndërkohë një tjetër fqinje rrëfen sesi e morën vesh lajmin e kobshëm: “Çunit të vogël mi kanë treguar në telefon se ishin në plazh dhe na thanë se kanë ngelë tre vetë në det”.