Planet e Interit për merkaton pa dyshim që kalojnë jo vetëm nga afrimet e emrave të rinj në skuadër, por edhe nga ata që mund të lënë Milanon, manovra të ndërlidhura ngushtë me njëratjetrën. Duke u përqendruar te të parët, zikaltrit po punojnë në shumë fronte, aty ku përveç Romelu Lukakut, emri më i përfolur është ai i Paulo Dibalës, për të cilin vetëm dy ditë më parë, Bepe Marota konfirmoi dëshirën për ta pasur në skuadër.
Por ndërkohë që argjentinasi ka marrë një muaj kohë, i kushtëzuar edhe nga buxheti i Interit që momentalisht nuk i lejon zikaltrit të formulojnë një ofertë që do të kënaqë sulmuesin, vetë klubi po pret që Sançez e Vidal të gjejnë një tjetër skuadër për të ardhmen, duke shpëtuar kështu nga rrogat më të larta në skuadër prej 7 dhe 6.5 milionë eurosh. Në të kundërt, Interi do të ushtrojë klauzolën e zgjidhjes së kontratës një vit para përfundimit të afatit për të dy, duke derdhur në llogaritë e secilit nga 4 milionë euro. Por nëse problemi me dy kilianët është rroga e lartë, mbërritja e njëkohshme e Lukakut dhe Dibalës mund t’i hapte rrugë një tjetër skenari: largimit të Lautaro Martinezit.
Qëndrimi i të treve në sulm do të ishte zgjidhja ideale për Simone Inzagin, por duket e pamundur, jo vetëm për shkak të rrogave të larta të repartit, por edhe të faktit që me sigurimin e dy sulmuesve të tjerë niveli si Lukaku e Dibala, Inter nuk do t’i thoshte “jo” shitjes së Lautaros që mund t’i sjellë arkave të skuadrës 70-80 milionë euro. Nuk përjashtohet që në rast të qëndrimit të “Demit” të jetë Edin Xheko ai që do të braktisë shtëpinë zikaltër, por në moshën 35-vjeçare largimi i boshnjakut mund të sjellë vetëm krijimin e hapësirës për një sulmues të ri, por jo të ardhura.
Kështu, Interi mund të gjendet sezonin e ardhshëm me një repart të rifreskuar, gjithmonë nëse rikthimi i Lukakut mund të quhet i tillë, por në Milano duhet t’i bëjnë llogaritë me lamtumirën e atyre që bënë që Interi të ishte sulmi më i mirë i Serisë A në sezonin që sapo u mbyll.
Arena e Lajmit
Loading…
and then