Dushan Vlahoviç ka lindur për të shënuar gol dhe për të bërë që të flasë për veten. Nga Firence në Torino substanca nuk ka ndryshuar, pasi atij i pëlqen që të fitojë respektin e të tjerëve dhe të fitojë skenën me punë, falë së cilës fiton shpesh faqen e parë.
Juventusi shpenzoi për të 80 milionë euro në janar jo më kot, pasi golin e ka në gjak, por mbi të gjitha ka treguar se ka edhe një karakter të fortë, nuk ngurron që të marrë përgjegjësi mbi shpatulla, madje edhe në momentet e vështira të skuadrës dhe të tij në pjesën e dytë të sezonit diti që të shprehë fjalët e duhura dhe konfirmoi besnikërinë ndaj “Zonjës së Vjetër”, falë së cilës ishte njeriu-kopertinë i bardhezinjve. Madje, jo vetëm i tyre, pasi DV7 fitoi edhe faqen e parë të revistës “Icon”, për të cilën tregoi ekskluzivisht shpjegimin e fjalës “gol” për të:
“Është diçka që më përmbush, më drithëron krejtësisht, ose në të kundërt, kur këto emocione nuk më përshkojnë pas ndeshjeve ndihem përtokë, ndihem bosh… Por nëse shënoj më duket sikur fluturoj, ndihem në qiellin e shtatë, i çlirët si një pupël. Goli është një lloj karburanti, një lloj droge për mua, të cilën pasi e provon kërkon të kesh edhe më shumë, të vazhdosh pa pushim. Të jetosh ato emocione është një varësi që të stimulon në çdo moment.
Goli është e vetmja arsye për të cilën jeton!” Por ndërsa u shpreh qartë se çfarë i pëlqen të përjetojë në fushë, lidhur me kohën e lirë Vlahoviç zbulon: “Unë jam një person që i dedikohem futbollit 24 orë, 7 ditë nga 7. Madje, edhe kur shkoj në shtëpi hap televizorin dhe zgjedh të shoh çdo ditë disa ndeshje të mëdha.
I shoh për t’u dëfryer, për t’u relaksuar, por në të njëjtën kohë për të mësuar dhe për t’u përmirësuar. Fokusohem, dalloj disa gjëra, mbaj shënime dhe analizoj: ‘Unë mund të kisha bërë këtë ose atë’”, ishte një pjesë e intervistës së Vlahoviçit për “Icon”, numri i muajit qershor.
Përgatiti: JETON STAMOLLA – Arena e Lajmit
Loading…
