Pukjanët janë në pritje të trajnerit të ri. Të vetmit të konfirmuar që do të vazhdojnë punën janë trajneri i portierëve Besnik Malaj dhe drejtori teknik Vitor Gjonaj.
Presidenti dhe drejtuesit e ekipit janë vënë në lëvizje për të gjetur sa më shpejt trajnerin e ri dhe për momentin Alert Alcani është më i favorizuari për të marrë drejtimin e Tërbunit.
Lezhjani në sezonin e fundit drejtoi Burrelin, por para pak ditësh ai njoftoi “divorcin” me matjanët, kështu që rruga është e hapur që Alcani të mbërrijë në Pukë.
Në një prononcim për “Panorama Sport”, trajneri i portierëve, i konfirmuar edhe për sezonin e ri, Besnik Malaj, u shpreh:
“Unë do të qëndroj te Tërbuni edhe për sezonin e ri 2022-2023 si trajner i portierëve.
Për mua është kënaqësi të jem pjesë e Tërbunit dhe për këtë falënderoj presidentin. Sezoni që mbyllëm ishte i bukur, ku dhamë më të mirën tonë.
Kishim një portier profesionist si Kukaj që pësoi pak gola.
Unë jam në kontakt me dy portierë, Kukaj dhe Demi. Për momentin, Kukaj më ka konfirmuar se do të vazhdojë të kontribuojë për ngjyrat e Tërbunit edhe në sezonin e ri, pavarësisht se ofertat nuk i kanë munguar edhe nga klube jashtë vendit.
Ndërsa sa i takon portierit Demi, e ka me pikëpyetje vazhdimësinë me pukjanët, pasi ka oferta nga disa klube shqiptare. Dëshira është ta kem përsëri në ekip.
Jam duke punuar me portierin 20- vjeçar, Erikli Limanaj, që nga sezoni i shkuar është pjesë e Tërbunit, por është aktivizuar pak. Është një portier i ri me të ardhme dhe duhet përgatitur mirë, se i ka të gjitha mundësitë për të bërë karrierë”.
DITMIR PEMA – Arena e Lajmit
Loading…
