VIDEO/ Tirana prish gjithçka për 6 minuta, mundet në sfidën e parë në Ligën e Kampioneve

Tirana kthehet me një humbje nga Luksemburgu, ku në ndeshjen e turit të parë të Ligës së Kampioneve është mundur nga Dudelanzh vendas.

Bardhebluve u kanë kushtuar shtrenjtë 6 minuta në pjesën e dytë të ndeshjes, periudhë në të cilën Limaj u ndëshkua në mënyrë të pakuptimte me dy kartonë të verdhë dhe më pas Hasan shënoi pas një përgjumje të prapavijës që i dha mundësinë që të mposhte Bekajn me tentativën e tij me kokë.

Deri atëherë, Tirana kishte menaxhuar me shumë lehtësi ndeshjen edhe pse nuk kishte krijuar raste dhe kartoni i kuq i kapitenit të vendasve, Kirsh, i kishte dhënë mundësinë që të luante në superioritet numerik. Por situata ndryshoi shumë shpejt dhe pas golit të pësuar, bardheblutë e patën të vështirë të reagonin, duke krijuar vetëm në fund të sfidës dy mundësi për të barazuar sfidën.

Tani Tiranës i duhet një përmbysje në ndeshjen e kthimit në javën e ardhshme në “Air Albania”, duke qenë e ndërgjegjshme që duhet të bëjë shumë më tepër në sulm sesa në sfidën e sotme.

DUDELANZH-TIRANA 1-0
71′ Hasan

MINUTË PAS MINUTE

90’+4’ Mbyllet ndeshja me fitoren 1-0 të vendasve.

90’+2’ Seferi merr topin në të majtën dhe pasi gjen hapësirën gjuan, por sfera kalon pasqyrën e portës dhe përfundon jashtë.

90’+1’ Ismailgeci provon me një gjuajtje nga jashtë zonës, portieri vendas grushton.

90’ Jepen 4 minuta shtesë në fundin e ndeshjes.

89’ Da Kruz driblon dy lojtarë dhe tenton nga jashtë zonës, por gjen Bekajn në pozicion.

88’ Skenderoviç i heq topin nga këmbët Seferit në momentin kur po përpiqej të godiste pas një pasimi të gjatë në zonë.

87’ Tirana qarkullon topin në gjysmëfushën kundërshtare pasi vendasit janë kthyer plotësisht në mbrojtje dhe tentojnë vetëm topin e gjatë para.

85’ Totre del nga fusha e lojës duke i bërë vend Qefalijas.

82’ Hasan dhe Sinani i lënë vendin në fushë Ninte dhe Antunes.

78’ Zëvendësimi i parë i Shehit është largimi nga fusha i Devid për t’i bërë vend Hasanit.

77’ Goditje dënimi për Tiranën, topi harkohet në zonë por Foks del dhe bën të tijën sferën para devijimit të Devid.

76’ Bojiç del nga fusha e lojës për vendasit, ndërsa aktivizohet Da Kruz.

73’ Bojiç provon përsëri nga e majta me një gjuajtje të fortë, por nuk gjen portën e Bekajt.

71’ Tirana e pëson. Pas një harkimi nga e majta, Hasan me kokë gjuan dhe pasi sfera prek shtyllën, përfundon në rrjetë.

68’ Limaj humb topin dhe pastaj bën faull duke u ndëshkuar brenda pak minutash me kartonin e dytë të verdhë dhe duke lënë edhe Tiranën me 10 lojtarë.

66’ Edhe Limaj përfundon në listën e të ndëshkuarve me karton të verdhë në këtë sfidë pas një faulli në mesfushë.

62’ Totre është i ndëshkuari i parë me të verdhë në radhët e skuadrës së Tiranës pas një faulli në mesfushë.

61’ Ouasiero dhe Shtumpf hyjnë në fushën e lojës në radhët e vendasve, teksa largohen Gashi dhe Haxhi.

59’ Limaj merr topin në të majtë dhe pason në qendër, sfera devijohet nga një mbrojtës i vendasve dhe pastaj sfera shkon në duart e portierit.

54’ Dudelanzh mbetet me 10 lojtarë. Kirsh bën një ndërhyrje të gabuar ndaj Totre dhe ndëshkohet me të dytin e verdhë.

53’ Xhxiha ka mundësinë e artë pasi shfaqet para portës, por gabon në momentin e gjuajtjes pasi dërgon sferën jashtë.

52’ Hasan driblon Behiratçe në krahun e djathtë dhe pasi merr fundoren pason për Bojiç, pro gjuajtja e këtij të fundit fluturon mbi traversë.

49’ Kirsh nga e majta harkon në zonë, Najdovski largon sferën në këndore.

46’ Nis pjesa e dytë pa ndryshime në radhët e të dy skuadrave.

45’+2’ Mbyllet pjesa e parë pa gola.

45’ Jepen 2 minuta shtesë.

42’ Gashi nga e djathta harkon në zonë, Bekaj i qetë pret sferën në pozicion.

40’ Ritëm pak më i ulët në këto momente, me skuadrat që tashmë janë të kujdesshme dhe mundohen që të bllokojnë gjithçka që në mesfushë.

34’ Përsëri një skemë nga Dudelanzh në goditje nga këndi, vendasit nxjerrin një lojtar në pozicion gjuajtje por Aleksi bllokon tentativën e tij.

32’ Seferi nga e majta arrin të driblojë një kundërshtar dhe pason për Devid në qendër. Mbrojtja vendase me vështirësi largon topin që vërtitej para katërkëndorit.

29’ Kirsh ndërhyn rëndë ndaj Seferit dhe ndëshkohet me karton të verdhë.

28’ Kirsh pason te Haxhi i cili rrotullohet mirë në zonë dhe gjuan, por gjen përgjigjen e Bekajt në pozicion.

25’ Toshevski nis topin drejt Seferit por ky i fundit nuk e kontrollon në zonë dhe portieri Foks ndal gjithçka.

23’ Seferi, i detyruar të luajë larg portës nga mbulimi i mbrojtësve vendas, mundohet të nisë Devid në sulm, por pasimi i tij bllokohet nga prapavija e Dudelanzh.

20’ Dudelanzh ka marrë kontrollin e lojës në këto momente, pasi Tirana është tërhequr duke tentuar që të thumbojë me kundërsulme për të shfrytëzuar çdo lloj hapësirë që lejojnë kundërshtarët.

17’ Seferi gjuan në portë pas një topi në thellësi, por sinjalizohet në pozicion jashtë loje.

15’ Sinani tenton me një gjuajtje nga jashtë zonës, Bekaj pret në dy kohë.

12’ Panik në zonën e bardhebluve pas një goditje dënimi ku vendasit provojnë të gjuajnë në portë dhe vetëm devijimi i një prej mbrojtësve të Tiranës eviton që sfera të shkojë në rrjetë.

10’ Vjen edhe mundësia e parë për të rrezikuar portën e bardhebluve me një goditje dënimi që harkohet në shtyllën e parë. Seferi me kokë arrin të devijojë por nuk çon sferën drejt katërkëndorit të vendasve.

5’ Kundërsulm i shpejtë i vendasve me Haxhi në të djathtën, topi i tij në qendër devijohet në momentin e fundit nga Behiratçe i cili largon topin në fundore.

3’ Goditje dënimi ballore e Tiranës, Ismailgeci gjuan por nuk kalon dot murin e rreshtuar para zonës.

1’ Nis dueli në Luksemburg.

FORMACIONET ZYRTARE

Dudelanzh: Foks, Skënderoviç, Da Kosta, Diuf, Kirsh, Gashi, Sinani, Bojiç, Morren, Hasan Nader, Haxhi.
Trajner: Karlos Fangueiro

Tirana: Bekaj, Najdovski, Behiratçe, Toshevski, Ismailgeci, Aleksi, Totre, Limaj, Seferi, Xhixha, Devid.
Trajner: Orges Shehi

Arena e Lajmit