“Panorama Sport” ka mësuar nga burime pranë klubit se kur trajneri Dritan Mehmeti është pyetur nga drejtuesit se cilat janë dëshirat e tij në merkato, përgjigjja e tij ka qenë: Me ruajtjen e grupit, më duhet një qendërmbrojtës dhe një sulmues për të qenë të kompletuar.
Dhe nuk ka vonuar shumë e një nga dëshirat e trajnerit në merkato, klubi po e bën realitet.
“Panorama Sport”, ekskluzivisht ka mësuar se Partizani ka gjetur akordin me një mbrojtës sllovak, i cili në fundjavë pritet që t’u bashkohet të kuqve.
Pikërisht bëhet fjalë për 27- vjeçarin Jozef Menish, i cili vjen te “demat” si lojtar i lirë.
Sezonin e fundit Menish e mbylli si titullar te Zlate Moravce, në elitën e futbollit sllovak, ku ka luajtur 30 ndeshje dhe ka shënuar dy gola.
Në të shkuarën qendërmbrojtësi ka luajtur edhe me klube në Sllovaki si Spartak Trnava apo Ruzhomberok.
Me afrimin e Jozef Menish Partizani konsiderohet “i blinduar” në qendër të mbrojtjes.
Por zërat e merkatos bëjnë me dije se pas aventurës evropiane, Eneo Bitri do të provojë një aventurë të re jashtë vendit, ndaj afrimi i sllovakut më shumë duhet parë si një hapje rruge nga klubi për shitjen e mbrojtësit beratas.
Gjithsesi, varet se çfarë rrjedhe do të marrë kjo lëvizje e mundshme e merkatos, ku padyshim e mira do të ishte që Bitri të vazhdonte dhe të shtonte sigurinë për Partizanin në sezonin e ri.
ILIR CARA – Arena e Lajmit
Loading…
Loading…