Paulo Dibala është padyshim një emër që do t’i bënte shumë punë cilitdo klub që do të siguronte shërbimet e tij, por çuditërisht argjentinasi është ende pa skuadër.
Gjithmonë emri i tij është lidhur me Interin, skuadra me të cilën kishte një pakt për transferimin që në maj, por zikaltrit ende nuk po bëjnë hapa në drejtim të tij.
Transferimi i Lukakut, mbipopullimi i sulmit dhe mosgjetja e akordit për kushtet financiare, e lanë pezull për një kohë të gjatë situatën që në kontaktin e fundit mes palëve është negociuar për një kontratë 4-vjeçare, me 5 milionë euro në sezon plus 1 milionë euro në formë bonusesh, nëse Dibala do të luante më shumë se gjysmën e ndeshjeve të sezonit të ardhshëm. Rikthimi i sulmuesit në Itali ka bërë që të ndizen të tjera pista të merkatos, që me sa duket, kanë nisur të frikësojnë tifozët e Interit.
“Duam Dibalën”, “Mos hiqni dorë nga Paulo”, kanë qenë vetëm disa nga thirrjet e tifozëve drejtuar kryesisë, një dëshirë që pavarësisht afrimeve të tjera, nuk është sfumuar në Milano. Edhe pse pohimet se reparti është i plotësuar, kanë ardhur si nga Zaneti dhe nga Marota e Inzagi, asnjëri prej tyre nuk e ka përjashtuar përfundimisht transferimin e 28-vjeçarit, që në fakt tani duket se ka një pengesë të madhe: Aleksis Sançezin.
SANÇEZ – Kiliani nuk dëshiron të largohet pa gjetur më parë akordin me një tjetër klub niveli dhe ka refuzuar 4 milionë eurot si klauzolë për zgjidhjen e kontratës një vit para afatit. Minimalisht, sulmuesi kërkon 5 milionë euro, një shifër të përafërt më 7 milionët e rrogës së tij dhe nuk do t’i lehtësojë aspak punën Interit, që me sa duket, nuk ka qenë një aventurë e këndshme për të. Këtë sinjal jep të paktën postimi i tij përshëndetës për Vidalin.
“Urime mik, jam i gëzuar që je i lumtur. Askush nuk e di sa punë të ka kushtuar të ngrihesh pas eksperiencave jo të bukura. Fundja ne kilianët kështu jemi”, ka qenë mesazhi i 33-vjeçarit, që njihet për opinionet e tij pa filtra në rrjet.
Arena e Lajmit
Loading…
Loading…
