Dy figura të rëndësishme të maxhorancës kanë abstenuar dje në votimin për ndryshimin në ligjin për hapjen e dosjeve të sigurimit, i sjellë nga vetë shumica, i cili mori dhe votat e deputetëve të PD të grupit të Alibeaj.
Pas një seance maratonë, parlamenti votoi në mesnatë disa ndryshime në ligjin për “Të drejtën e informimit për dokumentet e ish-Sigurimit të shtetit”, të cilat parashikojnë ndër të tjera hapjen e dosjeve, deklasifikimin e të gjithë dokumenteve nga 29 Nëntori 1944 deri në 2 korrik 1991 të cilat disponohen nga të gjitha arkivat e rrjetit arkivor të Republikës së Shqipërisë, si dhe heqin pengesat për riverifikimin e figurës së personave që kanë një certifikatë të mëparshme pasurie, kur për ta, shfaqen informacione të reja.
Në listën e publikuar nga Kuvendi për votimin, ajo që bie në sy është abstenimi i dy figurave të maxhorancës, deputetëve Damian Gjiknuri dhe Nasip Naço.
Sekretari i Përgjithshëm i Partisë Socialiste, Damian Gjiknuri ishte dje i pranishëm në seancë dhe foli për krizën energjetike pas akuzave të opozitës, por jo për ndryshimin në ligjin e dosjeve.
Ndërkohë që Naço ka qenë ministër i Drejtësisë nga viti 2013 deri në vitin 2015 nga Lëvizja Socialiste për Integrim kur ishte në koalicion qeverisës me PS.
Nga ana e tyre nuk ka pasur ndonjë shpjegim për vendimin për të abstenuar, një qëndrim i ndryshëm nga grupi parlamentar i PS. Ndërkohë 25 deputetë të PD votuan pro ndryshimeve në ligjin për hapjen e dosjeve.
and then