Në vijim të turit në Njësinë 3, ku zhvilloi një bashkëbisedim me të rinjtë, kryebashkiaku i Tiranës, Erion Veliaj tha koha e vështirë në të cilën po jetojmë për shkak të luftës në Ukrainë, na bën edhe më solidarë me njëri-tjetrin.
Ai ndau një lajm për t’ju ardhur në ndihmë familjeve më në nevojë në kohë krize, si krijimi i një karte sociale për të moshuarit. Sipas Veliajt, këto janë shtresat më vulnerabël të shoqërisë, që kanë nevojë për ‘dorën mbështetëse’ të qeverisë dhe bashkisë.
“Siç kemi kartën e studentit, ka ardhur koha të bëjmë një kartë sociale për të moshuarit. Dora e dukshme e qeverisë dhe e bashkisë në këtë rast, është më efikase kur ndërhyn në pikat më vulnerabël të shoqërisë, siç janë studentët dhe të moshuarit. Jemi në pikën kur po bëjmë disa llogaritje nëse është koha të ofrojmë të njëjtën paketë edhe për të moshuarit: pra, transport publik falas, apo edhe disa shërbime siç janë mensat, teatri, operat, muzetë, që mund të jepen me çmime të reduktuara për këtë grupmoshë, e cila është më vulnerabël, por sa herë ka një krizë të madhe, gjendet edhe më në vështirësi se të tjerët”, tha Veliaj.
I pyetur se çfarë u sugjeron të rinjve të studiojnë, Veliaj tha se mjafton që ata të fokusohen te e ardhmja. “Për sa kohë që po shkojmë te temat e duhura dhe nuk po merremi me ‘kush je ti’, i kujt je’ apo ‘nga ke ardhur’, edhe pse ka ende debate pa sens të tipit ‘unë nuk jam i ardhur në Tiranë’, po çfarë domethënë që nuk jam i ardhur në Tiranë? Në Tiranë të gjithë kanë ardhur nga diku, se qyteti është themeluar me 10 mijë vetë, sot jemi mbi 1 milion. Ky qytet është i destinuar të presë njerëz nga kudo. Madje, edhe tironsit e vjetër ia kanë parë hajrin rritjes së qytetit sepse shtëpia e gjyshit, që dikur ishte me qerpiç, me gjasë është bërë pallat dhe ata kanë përfituar 30% të pronës së tyre. Zhvillimi është mirë edhe për atë që vjen, edhe për atë që është këtu sepse prona i vlen më shumë. Të bëjmë debat, në vitin 2022, ‘ti je i ardhur’, ‘ti je konviktor’, ‘ti je ardhacak’ është mentalitet mesjetar”, tha ai.
Në fund, Veliaj kërkoi mbështetjen e të rinjve për më shumë punë të mira në qytet: “Do të vazhdojmë t’i mbështesim studentët, jo vetëm me transport falas. Sot janë qindra studentë, të cilëve ua kemi përgjysmuar koston e konviktit. Ky është një vit i vështirë, kur për shkak të luftës janë rritur të gjitha çmimet, energjia është kthyer në një nga problemet më të mëdha. Prandaj, në kohë kritike si kjo apo siç ishte tërmeti dhe pandemia, duhet të kujdesemi për ata që kanë më shumë nevojë”.
Kryebashkiaku tha se në pranverë do të hapet Piramida e Tiranës, për të pritur 4-5 mijë fëmijë e të rinj, që do të mësojnë mbi teknologjinë dhe punët e së ardhmes.
Bashkia e Tiranës ka ndërmarrë një sërë vendimesh për lehtësimin e familjeve në nevojë, në mënyrë që kriza për shkak të luftës që ka përfshirë gjithë botën, të mos impaktojë shtresat më vurnerabël. Deri më tani, mbi 10 mijë abone falas janë dhënë për studentët, ndërkohë që ka nisur subvencionimi nga 50%-70% i konvikteve. Gjithashtu, për çiftet e reja dhe familjet në nevojë janë dhënë kredi të buta dhe bonus qiraje.
and then