Një emër shumë i njohur për kampionatin shqiptar të futbollit është pranë kthimit edhe një herë si protagonist në vendin tonë. Nuredin Orelesi, katër herë kampion me Skënderbeun dhe shpesh i cilësuar si një nga mesfushorët më të spikatur të dekadës së kaluar në Superiore, është pranë kthimit si protagonist.
Por këtë herë, në Kategorinë e Parë, ku nigeriani 33-vjeçar duket se është pranë akordit me ekipin e Apolonisë. “Panorama Sport” mëson se futbollisti, i cili ka luajtur edhe me Dinamon, Vllazninë dhe Kamzën në futbollin tonë, është në provë te Apolonia ku është afruar nga ish-mbrojtësi Abraham Alçenu, i cili tashmë po bën rolin e menaxherit.
![bici-orelesi Ditmar Bicaj dhe Nuredin Orelesi pas miqësores mes Apolonisë dhe Flamurtarit](https://www.arenaelajmit.com/wp-content/uploads/2023/01/bici-orelesi.jpg)
Ditmar Bicaj dhe Nuredin Orelesi pas miqësores mes Apolonisë dhe Flamurtarit
Orelesi ka luajtur disa minuta në pjesën e dytë të ndeshjes miqësore të luajtur dje mes Apolonisë dhe Flamurtarit dhe pritet të vazhdojë në ditët në vijim të jetë nën mbikëqyrje nga stafi i skuadrës fierake para se të vendoset nëse do të firmosë përfundimisht me ta. Lojtari ishte zhdukur nga radarët që nga eksperienca e fundit me Kamzën, në vitin 2019, por tashmë duket pranë një kthimi të bujshëm në futbollin tonë, për të provuar edhe një herë të ngjitet në majë.
Arena e Lajmit
![](https://www.panorama.com.al/sport/wp-content/static/klikoperkepanoramaonline.jpg)