Erzeni e ka nisur sezonin në mënyrën më të mirë të mundshme dhe pakkush e kishte parashikuar fitoren në start ndaj Vllaznisë. Ai sukses është arkivuar, por kërkohet që të përsëritet edhe në sfidën e sotme, ku shijakasit luajnë në transfertë ndaj Kastriotit. Në lidhje me përgatitjet për këtë takim dhe gjendjen e skuadrës, trajneri i Erzenit, Xhevahir Kapllani, për “Panorama Sport” u shpreh:
“Na pret një sfidë e fortë ndaj Kastriotit, në një fushë të vështire. Do të shkojmë në Kamzë për të bërë një ndeshje me intensitet dhe për të dalë në lojën tonë.
Jemi përgatitur maksimalisht gjatë të gjithë javës. Grupi i lojtarëve është pothuajse i plotë, por merkatoja nuk është mbyllur ende, pasi edhe kampionati është i gjatë.
Lojtarët që kemi pasur në dispozicion do të jenë të gjithë të gatshëm, pasi dhe problemi me dokumentacionin është zgjidhur”.
Në dallim nga sfida e parë, trajneri Kapllani e ka më të plotë grupin, ndaj pritet edhe ndonjë lëvizje e lehtë në formacion për duelin me krutanët.
Erzeni do të kërkojë të ruajë entuziazmin e mirë të fitores ndaj Vllaznisë, por duke evituar euforinë, aq më shumë që luajnë ndaj një rivali direkt për sigurimin e mbijetesës, që mbetet objektivi parësor për të dyja ekipet.
RONALD FAJA – Arena e Lajmit
