Flamurtari bën goditjen e madhe në merkato.
Klubi ka siguruar shërbimet e Erik Flores, brazilianit që gati 6 vite më parë luante te Kukësi.
“Panorama Sport”mëson ekskluzivisht se mesfushori me tipare sulmuese ka pranuar që të rikthehet në Shqipëri, kësaj radhe për mbrojtur ngjyrat e kuqezinjve.
Me të do t’i jepet zgjidhje edhe ngërçit që skuadra ka pasur me finalizimin. Reparti i avancuar ka shfaqur shumë vështirësi në 5 miqësoret e zhvilluara, dhe sidomos pas dëmtimit të Andi Ribajt dhe Gesti Diamantit.
PARAKONTRATA
Gjithçka duket e mbyllur me 33-vjeçarin.
Burime konfidenciale pranë klubit konfirmojnë për gazetën se lojtari nga vendi i “sambas” e ka firmosur tashmë parakontratën.
Në kësi kushtesh, kthim pas nuk ka.
Ai pritet që javën që vjen të mbërrijë në Vlorë dhe prezantohet zyrtarisht si blerja më e re.
Paraqitja e tij në kohën kur luante te verilindorët dhe potenciali që zotëron, shihet si “bonus” për objektivit që Flamurtari ka këtë vit: që është ngjitja në Superiore.
KARRIERA
Erik Flores është i datëlindjes 1989 dhe ka lindur në Rio de Zhaneiro.
Lojtari 1.69 metër i gjatë mbahet mend mirë nga tifozët e Kukësit për atë që dha në sezonin 2015- 2016.
Në 42 ndeshje që u aktivizua, ai e gjeti 9 herë rrjetën.
Një dëmtim i rëndë në gju e detyroi fantazistin brazilian që të qëndronte gjashtë muaj larg fushave.
Kjo bëri që klubi verior të prishte kontratën më.
Më pas u bë pjesë e Boavistës, për të kaluar më pas në Seria B te Criciuma.
Gjatë kësaj periudhe ka pasur edhe një eksperiencë te Brasiliense, ndërsa sezonin e fundit e ka mbyllur te Remo.
CV-ja e tij është vërtetë mbresëlënëse, por ajo që ka joshur më së shumti vlonjatët është pa dyshim performanca fantastike që ai kishte te Kukësi.
MERKATO
Erik Flores nuk do të jetë i vetmi afrim në Vlorë.
Ai do të pasohet edhe nga dy goditje të tjera, deri në mbylljen të merkatos së verës.
Burime pranë klubit të futbollit “Flamurtari”, pohojnë se javën e ardhshme do të mbërrijnë në Vlorë edhe dy futbollistë.
Gjasat janë që edhe ata të jenë të huaj. Emrat mbeten mister, por mësohet se luajnë si mesfushorë dhe sulmues.
– Arena e Lajmit
