Milani i është kthyer përsëri fitoreve në kampionat, duke mundur me shifrat 2-0 skuadrën e Bolonjës. Kampionët në fuqi të Serisë A kanë fituar një ndeshje të dominuar nga fillimi e deri në fund, me raste të shumta për shënim dhe me lojë të shkëlqyer të yjeve të saj,
De Ketelar, i aktivizuar si titullar nga Pioli, ka përmbushur pritshmërinë në ndeshjen e tij të parë si titullar në kampionat në “San Siro”. Ai diktoi ritmin që në startin e sfidës dhe krijoi aksione të njëpasnjëshme, me golin e Leaos që ishte padyshim meritë e tij.
Më pas, Milani krijoi edhe raste të tjera, por goli i dytë do të vinte me një goditje spektakolare të Zhiru vetëm në fraksionin e dytë të lojës. Më pas, kuqezinjtë menaxhuan situatën dhe morën tre pikët që i duheshin për t’iu bashkuar përkohësisht në krye Lacios, Torinos dhe Romës.
MILAN-BOLONJA 2-0
21′ Leao, 58′ Zhiru
NGJARJET KRYESORE
68’ Bolonja i afrohet golit me anë të Sansone, por gjuajtja e këtij të fundit prek shtyllën e jashtme në të djathtë të Menja.
58’ GOOOL Milani! Leao nis një top në zonë për Zhiru i cili me një veprim akrobatik dërgon sferën në rrjetë.
45’+1’ Leao shpërthen si zakonisht në krahun e majtë dhe shfaqet para Skorupskit, por gjen përgjigjen vendimtare të portierit, i cili është me fat pasi topi kthehet te De Ketelar me belgun që e fluturon jashtë kuadratit.
44’ Zhiru ka mundësinë e artë për të dyfishuar shifrat teksa gjuan në zonë, topi përfundon jashtë katërkëndiorit.
28’ Mesias është ai i cili shfaqet në krahun e djathtë, gjuajtja e tij grushtohet nga Skorupski e pastaj Leao e dërgon topin në tribunë.
26’ De Ketelar ndez përsëri sulmin e Milanit, këtë herë duke pasuar për Kalulu i cili shfaqet para Skorupskit, por gabon duke dërguar topin në duart e portierit.
21’ GOOOL Milani! De Ketelar merr topin në mesfushë dhe pasi arrin pranë zonës pason për Leaon i cili godet në shtyllën e parë dhe çon topin në rrjetë.
1’ Nis dueli në “San Siro”.
FORMACIONET ZYRTARE:
Arena e Lajmit