Eljon Toçi ka nisur këtë edicion po ashtu siç përfundoi të kaluarin, duke shënuar gola të rëndësishëm për ekipin e të rinjve të Fiorentinës. Sulmuesi i përfaqësueses U21, ishte protagonist në duelin e sotëm që skuadra e tij fitoi 1-0 ndaj Milanit, duke shënuar golin e vetëm të sfidës.
Toçi, i cili në edicionin e kaluar falë golave që shënoi ndihmoi Fiorentinën të fitonte Kupën e Italisë për të rinj, këtë sezon mban edhe shiritin e kapitenit dhe ishte pikërisht ai që udhëhoqi ekipin e tij në fushën e lojës për sfidën e sotme.
Goli erdhi në minutën e 49 të sfidës, kur pas një aksioni në krahun e majtë, Toçi lëshoi goditjen vendimtare drejt portës, duke tundur rrjetën për herën e vetme në këtë sfidë, që ishte njëkohësisht goli i parë për këtë sezon për sulmuesin shqiptar.
Ai shënoi 11 gola në 33 ndeshje me ekipin e të rinjve të Fiorentinës në kampionat në sezonin e kaluar.
Arena e Lajmit
and then