Bylisi pësoi humbjen e parë në kampionat, pikërisht në javën e tretë ndaj Partizanit në stadiumin “Adush Muça”. Disfata i dëshpëroi të gjithë, që nga presidenca, stafi dhe sidomos tifozët.
Mallakastriotët humbasin disi terren në tabelën e renditjes, në një kohë që gara sa vjen dhe vështirësohet.
Ekipi sot do të zbresë në fushë, ku fillimisht do të zhvillohet analiza e disfatës në shtëpi, ndërsa më pas do të nisin edhe përgatitjet anti-Laçi, një ndeshje që do ta zhvillojë të dielën në transfertë.
Trajneri Arian Bellai do të ketë gati edhe dy nga afrimet e fundit të merkatos, prej të cilëve pritet shumë. Bëhet fjalë për qendërmbrojtësin Riste Karakamishev, si dhe sulmuesin Çarls Atshimene.
Të dy e ndoqën nga tribuna sfidën ndaj Partizanit, ndërsa tashmë kanë nisur nga puna për të kapur kohën e humbur dhe për t’u bërë “një” me pjesën tjetër të skuadrës.
Ndërkohë, krahasuar me Bylisin e dy sezoneve më parë në elitë, skuadra e këtij kampionati ka dy pikë më shumë.
Bylisi në tri ndeshjet e para në sezonin 2020-2021 kishte vetëm dy pikë, kur barazonte me Laçin në “Adush Muça” dhe më pas 2-2 në Fier me Apoloninë, ndërsa mundej në vijim nga Skënderbeu.
Në tri ndeshjet e para të këtij kampionati, skuadra mallakastriote ka 2 pikë më shumë, pasi ka fituar të parën me Kastriotin në Ballsh dhe barazoi në Durrës 1-1 me Teutën.
Në të njëjtën kohë me përgatitjet e ekipit të parë, ballshiotët po stërviten edhe për sezonin e ri me skuadrën U-21.
Bylisi është dy vite radhazi kampion kombëtar, ndërsa edhe këtë sezon politikat e klubit sigurisht që nuk kanë lënë pas dore të rinjtë. Janë shumë lojtarë të talentuar, vendës dhe të huaj, që pritet të jenë edhe nën vëzhgimin e stafit të skuadrës së parë.
Në të tilla kushte, ballshiotët do të kërkojnë që ta nisin si kampionë ndaj Tiranës nesër në kryeqytet për kampionatin U-21.
ERJON SALIU – Arena e Lajmit