Tirana vazhdon përgatitjet për ndeshjen kundër Kastriotit, teksa dje bardheblutë kanë zbritur në fushë për të zhvilluar seancën e dytë stërvitore. Nën urdhrat e stafit teknik, aty u pa që edhe drejtori Tefik Osmani zbriti në fushë për të asistuar në disa ushtrime që lojtarët aplikuan.
Si gjithmonë, në pjesën e parë të seancës ishte përgatitësi atletik, Kosta Jani, ai që zhvillon nxehmjen e skuadrës. Ashtu si edhe ditën e hënë, programi i stërvitjes ishte me ngarkesë të lartë, por dje kjo ngarkesë u mor duke i alternuar ushtrimet edhe me topin, në formën e një cirkuiti. Në vijim, tekniku Shehi, i asistuar edhe nga Osmani, zhvilluan disa ushtrime ku baza ishte reagimi i shpejtë dhe situatat një kundër një.
Në përfundim, seanca u mbyll me lojë në një perimetër fushë shumë të vogël, ku lojtarët u “ngopën” me golat e shënuar. Ritmi ishte tepër i lartë, me një kohë pushimi të shkurtër, teksa u vu re një lojë e luftuar nga të gjithë lojtarët, çka tregon se konkurrenca në skuadër për një vend titullari, është në rritje. Duke nisur nga dita e sotme e në vijim, trajneri durrsak pritet që të mendojë edhe formacionin që do të hidhet në fushë ndaj Kastriotit.
GRUPI – Përveç Huseinit, i cili nuk ishte i pranishëm në seancën e djeshme, i veçuar u stërvit edhe Nikqi me Bruno Lulajn. Ky i fundit u bashkua me grupin vetëm në lojërat të cilat u zhvilluan në fundin e stërvitjes, ndërsa pjesën e parë zhvilloi vetëm ushtrime individuale dhe vrapime të lehta. Pjesa tjetër e grupit kanë përfunduar seancën stërvitore pa pasur asnjë shqetësim.
Arena e Lajmit