Liga e Kampioneve nisi për herë të parë pas 19 vitesh pa superyllin e saj. Kristiano Ronaldo ka qenë pjesë e kompeticionit europian elitar për klube që prej sezonit 2003-’04. Fillimisht si lojtar i Mançester Junajtidit, pastaj Realit të Madridit, Juventusit dhe prej 2021-shit sërish i Junajtidit. Por këtë vit, “Djajtë” do të luajnë në Ligën e Europës dhe tentativa e portugezit për t’u larguar nga “Old Trafford” këtë verë dështoi. Dje 37-vjeçari e shijoi kompeticionin e tij të preferuar vetëm si spektator përpara TV. Ndërsa, aventura europiane e klubit të tij nis të enjten kundër Sociedadit në “San Sebastian”.
Por edhe pa CR7 si kundërshtar në fushë, lojtarët aktualë në Champions duhet të maten me portugezin. Sepse Champions-i është kompeticioni i tij dhe ai dominon rekordet e këtij turneu. Statistikat – Ronaldo ka luajtur 183 ndeshje në Champions, më shumë se çdo lojtar tjetër. I dyti është Kasijas me 177 dhe i treti Mesi (156). Me 98 ndeshje në fazën e grupeve, portugezi është gjithashtu rekordmen dhe lë pas gjithnjë Kasijasin (95) dhe Mesin (81).
Me 140 gola në total, CR7 është shënuesi më i mirë i turneut. Ai ka shënuar 105 gola për Realin, 21 për Junajtidin dhe 14 për Juventusin. Ndjekësi i tij i parë është Mesi (125). Kristiano është shpallur golashënuesi më i mirë i turneut në gjashtë sezone radhazi. Fillimisht në 2007-’08 dhe pastaj sërish në 2012-’13, 2013-’14, 2014-’15, 2015-’16, 2016-’17 dhe 2017-’18. Në sezonin 2013-’14 ai shënoi 17 herë, më shumë se çdo lojtar tjetër gjatë një sezoni të vetëm. Ai e tundi rrjetën gjithashtu 16 herë gjatë 2015-’16 dhe 15 herë në 2017-’18.
Robert Levandovski dhe Karim Benzema kanë arritur të shënojnë vetëm 15 herë gjatë një sezoni të vetëm. Ronaldo mban edhe rekordin e numrit më të madh të golave të regjistruar në një fazë grupesh: në 2015-’16 e tundi rrjetën 11 herë për Realin. Deri tani, ai është i vetmi lojtar që ka shënuar golin e parë të sezonit dy herë: (në 2009 dhe 2021). Ronaldo e ndan rekordin e më shumë tripletave bashkë me Mesin: të dy kanë shënuar nga tetë. Me pesë triumfe në finale, 37-vjeçari është gjithashtu rekordmen këtu.
Por ai ndan edhe rekordin e më shumë finaleve të luajtura bashkë me Paolo Maldinin (6). CR7 është mes dy lojtarëve që kanë shënuar në çdo ndeshje të fazës së grupeve (2017-’18 me Realin). Përveç sulmuesit portugez e ka bërë edhe Sebastian Haler sezonin e shkuar me Ajaksin. Shtatë lojtarë kanë shënuar dy gola në finale. Mes tyre është sigurisht edhe Kristiano, i cili regjistroi një dopietë në triumfin e Realit 4-1 ndaj Juventusit në 3 qershor 2017. Një gjë është e qartë: Ronaldos do t’i mungojë Championsi po aq sa Champions-it ai. Ngushëllimi i vetëm do të jetë nisja e rekordeve të reja nga Liga e Europës…
Arena e Lajmit