Bylisi është një ndër klubet e spikatura në Shqipëri në promovimin e lojtarëve me moshë të re, si vendas dhe të huaj. Njëri prej tyre është edhe senegalezi me pasaportë italiane, Babakar Fall. Sulmuesi 21- vjeçar, 191 cm i gjatë, në një intervistë për “wiwsport”, tregon historinë dhe pasionin e tij për futbollin, dëshirën e tij për të luajtur me kombëtaren e Senegalit.
Mançester Junajtid është klubi i tij i ëndrrave. Viti 2017 ishte viti që shënoi karrierën e tij dhe gjatë intervistës tregon si përfundoi nga Italia në Ballsh, ku Bylisin e shikon si një trampolinë për në arenën europiane.
Ku e keni nisur aventurën tuaj si futbollist në Senegal?
Unë kam lindur në Dakar dhe prej 5 vitesh jetoj jashtë vendit, aktualisht në Shqipëri. U stërvita në Dakar në shkollën e futbollit “Modou Mbaye”. Në vitin 2017 u promovova si kadet për të luajtur në kategorinë U-17. Shënova 25 gola në atë vit dhe ky ishte shkas për karrierën time. Unë iu bashkova “Génération Foot” për vetëm disa muaj por nuk firmosa atje. Më pas udhëtova jashtë vendit.
Pse fillimisht Italia?
Babai im ka shumë kontakte atje. Ai është një konsulent sportiv dhe ka një kontratë me AC Monza, ku kam luajtur për një sezon. U përzgjodha me ekipin italian U-17 dhe luajta një ndeshje miqësore. Në fund të sezonit shkova te Benevento (nën 19 vjeç) ku kalova një sezon dhe më pas u ktheva në Monza. Presidenti donte që unë të nënshkruaja një kontratë profesionale për të luajtur me të rinjtë, por nuk pranova. Shkova në Dakar për pushime. Më pas arritëm marrëveshje me klubin e Bylisit në Shqipëri.
Çfarë e motivoi ndryshimin tuaj në marrjen e ofertës së re?
Ndryshova klubin sepse doja të tregoja talentin tim me një ekip profesionist dhe, natyrisht, të merrja më shumë kohë për të luajtur.
Si ishte debutimi juaj me klubin tuaj të ri, Bylisin?
Këtu fillova në janar 2022, skuadra luante në Kategorinë e Parë. Kam luajtur 14 ndeshje (ekip i parë dhe U-21) dhe kam shënuar 17 gola. Skuadra u ngjit më pas në elitën e futbollit shqiptar. Paraqitjet e mira tërhoqën skautët. Kam marrë shumë oferta nga klube në Europë, por për momentin preferoj të qëndroj këtu te Bylisi.
Cili është objektivi juaj këtë sezon?
Qëllimi im këtë sezon është të shënoj shumë gola për të tërhequr vëmendjen e klubeve të mëdha europiane.
Ju thoni se keni luajtur me Italinë me kombëtaret e moshave. Po Senegali? A ju kanë kontaktuar ndonjëherë nga federata e Senegalit apo trajneri i kombëtares?
Jam në kontakt me federatën italiane, sepse duan të më thërrasin me U-21. Ndiqnin paraqitjet e mia, siç thashë edhe më parë, pasi kam luajtur më herët me U-17. Nuk kam asnjë kontakt me federatën senegaleze, por dëshira ime është të luaj për Senegalin. Unë pres për kohën time.
Si i vlerësoni rezultatet e Senegalit?
Paraqitja është e mirë. Kemi një ekip të mirë dhe lojtarë të mirë, po arrijmë rezultate të mira në nivel kontinental dhe botëror. Ky është një kufi i mirë përparimi.
Si e keni jetuar natën e 6 shkurtit(kualifikimin e Senegalit në Botërorin e Katarit)?
Ishte një ditë e bukur. Nuk mund ta mbaroja lojën sepse duhej të kapja një fluturim për të nënshkruar kontratën time. Më vonë e mora vesh rezultatin dhe duhej të më shihje të gëzuar në aeroport. Kam festuar si çdo patriot.
A keni takuar ndonjëherë një yll që ka pasur ndikim në pjesën tjetër të karrierës suaj?
Kam parë shumë yje në jetën time, sepse kam lindur në futboll. Në darkat gala sportive në Milano ishte parada dhe babai më merrte shpesh. Isha i lumtur si çdo fëmijë që i njeh këta emra të mëdhenj të futbollit.
Babai juaj, një element thelbësor në karrierën tuaj…
Po, patjetër. Ai quhet Sidy Fall dhe është agjent. Ai ka bashkëpunuar me shumë lojtarë. Në fillim nuk i pëlqeu ideja që unë të luaja futboll. Ai këmbënguli më shumë për studime. Por unë isha ai djali që ishte aq i apasionuar pas futbollit, saqë futi një top në çantën e shpinës për të shkuar në shkollë.
Cili është klubi europian ku ëndërroni të luani?
Mançester Junajtid, pa hezitim. Ka gjithmonë lojtarë të mëdhenj në këtë klub, aktualisht Kristiano Ronaldo. Dhe shpesh, ata nuk janë lojtarë afrikanë. Unë jam një sulmues i klasit të parë, gjithçka është e mundur.
Kush ju frymëzon dhe a keni idhull?
Sinqerisht, nuk kam idhull. Unë dua të shkruaj historinë time. Nuk mund ta përshkruaj, jam unik.
Arena e Lajmit
NDIQE LIVE “PANORAMA TV”
and then