Kërkuan Gjinushin kryetar përjetë, Akademia reagon në emër të dy deputetëve të PS: Është tërhequr vetëm një amendament, por…

Deputetët e mazhorancës janë shfaqur tejet të vendosur për të miratuar zgjatjen e mandatit të Skënder Gjinushit në krye të Akademisë së Shkencave brenda këtij sesioni parlamentar, madje duke hequr dorë edhe nga amendamentet e tjera.

Petro Koçi dhe Ismet Beqiraj kanë paraqitur një projektligj për të ndryshuar ligjin në fuqi për Akademinë e Shkencave, duke kërkuar që kryetari i Akademisë të ketë të drejtë të rrijë mandat pas mandati në krye të institucionit që drejton.

Mësohet se dy deputetët i kanë dërguar një letër kryetares së Komisionit të Edukimit, Flutura Açka ku kërkojnë që të miratohet të hënën vetëm amendamenti që lejon kryetarin e Akademisë te kandidojë për një mandat të dytë, përfshi edhe heqjen e kufizimit të moshës, 75 vjeç.

Ndërkohë sot ka reaguar Akademia e Shkencave në emër të dy deputetëve, duke u shprehur ndër të tjera se nuk ka asnjë cungim të projektligjit, dhe se është tërhequr vetëm një amendament shtesë nga vetë propozuesit për arsye proceduriale. Sipas Akademisw, thuhet se këtë fakt disa duan ta përdorin për të bllokuar procedurën e miratimit të projektligjit dhe reformën e ASHSH.

Reagimi i plotë i Akademisë së Shkencave:

SKANDAL ËSHTË MASHTRIMI I OPINIONIT PUBLIK

-Projektligji aktual për Akademinë e Shkencave, nismë  ligjore e dy deputetëve, Ismet Beqiri e Petro Koçi, është një qind për qind ai i propozuar së pari e mbështetur nga Asambleja e Akademisë.

-Nuk ka asnjë cungim të projektligjit, është tërhequr vetëm një amendament shtesë nga vetë propozuesit për arsye proceduriale.

#ASHSH

Përgënjeshtrim e sqarim i opinionit akademik e më gjerë:

Projektligjit për disa ndryshime në ligjin për Akademinë e Shkencave nuk i është ndryshuar asnjë germë referuar variantit të miratuar në Asamble, që është i njëjti me atë të kthyer në iniciativë parlamentare nga dy deputetë të nderuar, Ismet Beqiri e Petro Koçi.

Amendamenti i vetëm i tërhequr para disa ditësh është një propozim i ri, që ka të bëjë me bartjen e fondeve, propozim i cili nuk ka marrë mbështetjen me shkrim të Ministrisë së Financave dhe në këto rrethana nuk mund të shqyrtohet në Kuvend.

Këtë fakt disa duan ta përdorin për të bllokuar procedurën e miratimit të projektligjit dhe reformën e Akademisë së Shkencave. Dështimi kësaj taktike i detyron të gënjejnë opinionin publik dhe të sajojnë skandale të paqena. Ndërkohë, çdo qytetar e di se tërheqja e një amendamenti nga vetë propozuesi është e drejta e tij dhe ky veprim nuk ka pse të indinjojë kerkënd. Aq më tepër kur kjo bëhet për arsye proceduriale dhe për pengesa që nuk vijnë prej tij.

Me këtë rast, ne shprehim dhe një herë mbështetjen për këtë projektligj në emër të 52 antarëve firmëtarë të Asamblesë së Akademisë së Shkencave së Shqipërisë.