Ministri i Brendshëm Taulant Balla dhe Drejtori i Përgjithshëm i Policisë zhvilluan një vizitë inspektuese në Qytetin Studenti, i cili ka hapur dyert për qindra të rinj me nisjen e vitit të ri akademik. Balla deklaroi se Paketa e Sigurisë do të përfshijë edhe këtë zonë, me rëndësi të posaçme.
“Dua që këtë vit, Paketën e Sigurisë në Shkolla ta shtrijmë edhe te Qyteti Studenti, i cili është i mirëfilltë, një qytet më vete. Ai mirëpret studentë, konviktorë nga gjithë Shqipëria dhe jo vetëm, sepse kemi, besoj edhe nga trojet shqiptare, të cilët vijnë dhe frekuentojnë universitetin. Në këtë kujdes të veçantë që kemi përfshirë brenda Paketës, ta përfshijmë edhe Qytetin Studenti, qoftë për problematikat që lidhen me qarkullimin rrugor, ku duhet të kemi një kujdes të veçantë, por fokusi është lufta kundër drogës. Ne duam që këtë perimetër sigurie ta shtrijmë edhe jashtë konvikteve ose jashtë ndërtesave në mënyrë që të garantojmë një perimetër sigurie funksional dhe të garantojmë, e këtu dua t’u flas drejtpërdrejt të gjithë prindërve, familjarëve të djemve dhe vajzave që kanë ardhur këtu dhe tashmë janë në besën tënde dhe në besën tonë, që ne do të kujdesemi për ta që brenda këtij perimetri sigurie të mos kemi problematika që lidhen me kriminalitetin, me fenomenin e përdorimit apo shpërndarjes së lëndëve narkotike”, u shpreh ministri i Brendshëm.
Drejtor Rrumbullaku informoi se vëmendja e Policisë së Shtetit dhe DVP Tiranë ka qenë për të dyja qendrat studentore. Ai tha se është planifikuar jo vetëm shërbim i hapur me uniformë, por edhe shërbime operacionale që vëzhgojnë.
“Këtu kemi të instaluar një Stacion Policie. Gjithashtu kemi edhe Zonën Policore me të gjitha llojet e shërbimeve. Infrastruktura duhet parë, sepse këtu kemi një rrugë që mbulon edhe një pjesë të komunitetit që banon në pjesë rrugore. Mbase duhet rregulluar e ta shikojmë edhe me bashkinë se si mund ta zgjidhim që një pjesë e mirë e banorëve, por edhe mjeteve që hyjnë në të, të jenë mjete të autorizuara që të kalojnë në Qytetin Studenti”, shtoi Drejtori i Përgjithshëm i Policisë së Shtetit.
Ministri u kërkoi studentëve të japin një kontribut të shtuar për mbarëvajtjen e qetësisë dhe sigurisë në Qytet Studenti, kjo duke ndarë me Policinë informacion.
“E rëndësishme është që studentët pjesën më të madhe të nevojave e kryejnë brenda godinës. Kushtet janë. Ne të bëjmë pjesën që i takon Policisë së Shtetit, e në kuadër të Paketës së Sigurisë edhe me institucionet e tjera, si AKU, Inspektorati Shtetëror Shëndetësor etj. Prindërit kanë shumë besim që në Qytetin Studenti ka më shumë rregull ka më shumë siguri. Ajo që duam të sjellim shtesë do të rritë edhe më shumë sigurinë apo rehatinë e prindërve, qoftë shefi i Komisariatit, apo Drejtori vendor janë të angazhuar për këtë pjesë”, tha Balla.
Drejtoresha e Qytetit Studenti shpjegoi se është krijuar një aplikacion online për të bërë regjistrimin e studentëve, për të bërë pagesën. Studentët pohuan thanë se kushtet ishin shumë të mirë dhe siguria gjithashtu.
and then