Vlora Marina ka nënshkruar një tjetër marrëveshje partneriteti, këtë herë me D-Marin, rrjetin prestigjioz të menaxhimit të marinave në gjithë Mesdheun dhe në Emiratet e Bashkuara Arabe.
Marrëveshja e firmosur nga të dyja palët parashikon marrjen përsipër nga ana e D-Marin të të gjitha shërbimeve të nevojshme për funksionimin e portit turistik të Vlorës që po ndërtohet nga e para nga kompania Vlora Marina. Ofrimi i shërbimeve të tilla si ankorim, furnizim me karburant, siguri 24h, mirëmbajtje e mjeteve lundruese, sigurim i pajisjeve portative të marinës duke përfshirë automjetet dhe varkat e punës si dhe shumë të tjera do krijojnë një standard të ri për turizmin blu në vend dhe do e pozicionojnë Vlorën si destinacion të rëndësishëm në Mesdhe. Marina e Vlorës do të jetë jo vetëm një infrastrukturë moderne e ndërtuar krejtësisht nga e para por edhe një hapësirë shërbimesh cilësore të standardeve ndërkombëtare për turistët që preferojnë të udhëtojnë nga deti. Si një hapësirë e hapur për të gjithë, shërbimet e portit do të jenë në funksion të të gjithë turistëve dhe banorëve të Vlorës.
Vanova Strakosha, Drejtore e Përgjithshme e Vlora Marina në fjalën e saj përpara nënshkrimit të marrëveshjes tha se ky bashkëpunim vendos standarde të reja në mënyrën e menaxhimit të marinave si dhe ofrimit për herë të parë të shërbimeve ekskluzive në Shqipëri.
“ Porti turistik i Vlorës është një investim prej rreth 45 milion euro që do e ndihmojë Vlorën dhe Shqipërinë në rritjen e standardit të ofertës turistike. Për vetë rëndësinë që ka Porti Turistik i Vlorës, nuk mund të mos i kushtonim vëmendjen maksimale partnerit që do ta menaxhojë atë. Prandaj, sot jemi këtu për të kurorëzuar një tjetër bashkëpunim që afron një tjetër emër të rëndësishëm ndërkombëtar në fushën e turizmit në vendin tonë. Kompania D-Marin do të jetë krah nesh në këtë rrugëtim për transformimin e turizmit blu në Shqipëri dhe për vendosjen e standardeve të reja në atë çfarë ofron Shqipëria detare.”
D-Marin operon në këtë sektor prej dy dekadash duke e zgjeruar rrjetin e saj, në Itali, Spanjë, Kroaci etj. Ajo e ka nisur aktivitetin me marinën e parë në Turqi dhe sot ofron shërbime menaxheriale dhe zhvillimi për rreth 23 marina në 8 vende të ndryshme të botës me një numër total prej 12 mijë vendesh ankorimi. Një element shumë i rëndësishëm në punën e përditshme të kësaj kompanie është kujdesi ndaj mjedisit, për të reduktuar në maksimum ndotjen dhe për të garantuar një ambient sa më të pastër dhe të shëndetshëm.
Pjesë e filozofisë së D-Marin është mbështetja për nevojat e komunitetit, duke treguar respekt për kulturën dhe traditën e zonës. Përveç menaxhimit të marinave, kompania ka kontribuar gjithashtu edhe në mbështetje të zhvillimit social- kulturor dhe ekonomik në rajonet ku operon, duke u fokusuar në kapitalin njerëzor dhe ambientin natyror.
“Janë disa elementë që na bënë të përzgjedhim Vlora Marinën për të bashkëpunuar. Kryesori është vendndodhja gjeografike e Vlora Marinës, pasi është pikë takimi mes detit Jon dhe Adriatik. Ne kemi marina në Kroaci, Greqi dhe Turqi duke i nxitur klientët tanë të shëtisin në këto tre lokacione. Pika që mungonte deri tani ishte pikërisht Vlora. Ambicia është një nga motot tona, për të qenë sa më në nivel botëror dhe ky projekt nuk kufizohet vetëm me kaq, pasi Vlora është një qytet që është duke u zhvilluar”, thekson Gyozo Lantos, Drejtor i Shërbimeve Globale dhe Blerjeve, D-Marin.
Ndërsa sipas Selcuk Balci, Drejtor Menaxherial D-Marin, turizmi detar është një kontribut shumë i madh në ekonominë e një vendi dhe sjell të ardhura shtesë. Përveç gjenerimit të vendeve të punës për komunitetin përreth marinës, zhvillohet edhe ekonomia që operon përreth Vlora Marinës. Shqipëria ofron një potencial shumë të madh pasi ka një vijë të bukur bregdetare, ka turizëm kulturor historik, i ka të gjitha bashkë për t’u shndërruar në një destinacion të fuqishëm potencial.
Për ndërtimin e portit turistik kompania Vlora Marina do të investojë rreth 45 milion euro. Marina do të përmbajë 438 vende ankorimi për jahte dhe mega-jahte, me gjatësi deri në 50 metra. Marina, apo porti turistik i Vlorës, është një koncesion që parashikon transformimin e portit të vjetër industrial në një marinë turistike sipas strategjisë së shtetit shqiptar për zhvillimin e turizmit. Koncesioni parashikon ndërtimin, menaxhimin për një afat kohor 35 vjeçar dhe më tej kalimin e portit turistik te shteti. Pas përfundimit të periudhës koncensionare porti turisti i kalohet shtetit shqiptar. Vlera e marinës në momentin që do i dorëzohet shtetit shqiptar do jetë rreth 5 herë më e lartë sesa vlera e investimit për ndërtimin e saj. Vlerë e shtuar do të jetë edhe mirë-pozicionimi i marinës në hartat e turizmit detar të Mesdheut dhe ndërtimi në afërsi të portit, të hoteleve me 5 yje duke e plotësuar gamën e shërbimeve.
Kjo është marrëveshja e rradhës e rëndësishme që Vlora Marina nënshkruan në pak kohë. Më herët është nënshkruar edhe një marrëveshje me rrjetin prestigjioz Marriot, një marrëveshje që do të sjellë për herë të parë në Shqipëri konceptin e apartamenteve të branduara dhe hotelin me 5*, Vlora Marriot Hotel.
and then