U ekstradua nga Dubai, mediat belge: Franc Çopja objektiv me vlerë të lartë, porositi me SKY ECC vrasjen e Ardit Spahiut

“Franc Gergely alias Franc Çopja është një nga objektivat e shumtë me vlerë të lartë të kërkuar nga Belgjika, të cilët janë vendosur në Dubai gjatë dekadës së fundit për të shmangur kthetrat e policisë dhe gjyqësorit” shkruajnë mediat blege pas ekstradimit të Elbasanlliut nga Dubai.

Sipas mediave Gergely ishte lart në listën e dëshirave të ministrit të Drejtësisë Paul Van Tigchelt, sepse shqiptari shihet si një nga figurat kryesore të mafies shqiptare të kokainës në Evropë.

“Gergely duhet të gjykohet në vendin tonë për ekzekutimin e Ardit Spahiut, i goditur me plumba në rrugë në Molenbeek. Gjykata belge e sheh Gergely si personin që urdhëroi vrasjen. Hetuesit morën prova për përfshirjen e Gergely në ngjarjet në Molenbeek nga komunikimet e përgjuara të Sky ECC. Gergely mësohet se ka dhënë urdhër nga Dubai për të vrarë Ardit Spahiun, i cili vinte nga i njëjti fshat me Franc Gergely.

Tre persona të maskuar iu afruan Spahiut më 27 nëntor 2020 kur ai doli nga një kafene në Condorlaan në Molenbeek. E qëlluan pa mëshirë. Viktima nuk ishte i panjohur për policinë federale. Në momentin e vrasjes, Spahiu ishte i dyshuar në një hetim të madh droge që rezultoi në mega-gjyqin ku u përfshinë 124 të dyshuar. Ky proces aktualisht është duke u zhvilluar në Bruksel” vijon me tej shkrimi i “Nieuësblad”. “Hetimi që pasoi vrasjen tregoi se faktet e Molenbeek mund të lidhen me një duzinë vendbanimesh në mjedisin shqiptar”, tha zyra e Ministrit të Drejtësisë Paul Van Tigchelt.

“Franc Gergely është krimineli i parë i drogës që ekstradohet që nga hyrja në fuqi e traktatit të ekstradimit midis Belgjikës dhe Emirateve të Bashkuara Arabe. Vendi ynë prej disa kohësh u kërkon autoriteteve në Emiratet që të ekstradojnë kreun e mafies ndërkombëtare të drogës, e cila prej vitesh ndodhet në Dubai. Një nga objektivat e tjerë me vlera të larta aktualisht në burgun e Dubait është shtetasi i Antëerpenit Nordin El H. Përveç kësaj, vendi ynë ka kërkuar ekstradimin e figurave kryesore si Othman El Ballouti, Hoesni A., Omar G. e dhjetëra të tjerë” përfundon shkrimi.