Policia arrestoi 2 persona, të dyshuar të përfshirë si bashkëpunëtorë në vrasjen e Gentian Bejtjes. Në prangat e policisë ranë shtetasit Ilir Beqaraj dhe Edison Haxhiu.
Në lidhje me këto arrestime, ka reaguar ministri i Brendshëm Taulant Balla. Numri një i Ministrisë së Brendshme ka përgëzuar policinë për punën e bërë në lidhje me ngjarjen e ndodhur në Fushë Krujë, teksa shton se pret rezultate nga ngjarje të tjera kriminale që kanë ndodhur në Vlorë, Lezhë e në Shkodër.
Reagimi i ministrit Taulant Balla:
Detyra e Policisë së Shtetit është të parandalojë ose të zbardhë çdo ngjarje kriminale dhe të vendosë para drejtësisë fajtorët. Sapo kam përgëzuar drejtuesit e Drejtorisë Vendore të Policisë Tiranë për punën e deritanishme hetimore në drejtim të zbardhjes së ngjarjes kriminale disa ditë më parë në Fushë-Krujë.
Pres gjithashtu rezultate edhe në drejtim të identifikimit të autorëve të ngjarjeve në Vlorë, Lezhë dhe Shkodër. Autorët apo porositësit e ngjarjeve kriminale mund të fshihen për një kohë, brenda dhe jashtë vendit, mund të tentojnë t’i shmangen ekstradimeve, por detyra e Policisë së Shtetit është t’i gjejë kudo që fshihen dhe t’i vendosë para drejtësisë. Për këtë qëllim duhet punë e pandërprerë hetimore dhe bashkëpunim me agjencitë partnere dhe me qytetarët, informacionet e të cilëve janë shumë të vlefshme. Dy persona të kërkuar nga drejtësia janë ndaluar/ekstraduar gjatë 24 orëve të fundit.
(Arena e Lajmit)
and then