“Shqipëria fiton nga marrëveshja për emigrantët”, Zef Bushati: Na duhet mbështetja e Italisë, vend i fortë me reputacion ndërkombëtar

Ish-ambasadori Zef Bushati, në një intervistë me moderatoren Nisida Tufa në News 24 deklaroi se Shqipëria fiton nga marrëveshja me emigrantët me Italinë.

Zef Bushati theksoi se Shqipëria ka nevojë për mbështetjen e shtetit italian, pasi Italia është një vend i fortë me reputacion ndërkombëtar.

“Kjo është marrëveshje normale, nuk ka hije nga pas. Nuk jam me mendimin që ne po bëjmë nder. Shqipëria fiton nga kjo marrëveshje. Kryeministri tha se nuk kemi marrë para, por sot marrëdhëniet e interesit janë të kohës. Ne shqiptarët e harrojmë këtë gjë dhe ju themi të huajve “mirë se erdhët”. Unë mendoj se Shqipëria e Italia kanë pasur gjithmonë marrëdhënie mjaft të mira dhe kjo i shërben forcimit të raporteve dypalëshe. Më vjen mirë që marrëdhënia mes Shqipërisë e Italisë po rregullohet. Prezenca italiane është në Shqipëri, pasi ka shumë sipërmarrës italianë këtu. Kjo marrëveshje do i shërbejë zgjerimit të raporteve mes Italisë dhe Shqipërisë. Ne kemi nevojë për Italinë, jo Italia për ne. Edhe heroi ynë kombëtar është mbështetur nga Italia. Ne kemi nevojë për mbështetjen e Italisë, shteti italian është një vend i fortë, që bën pjesë në shumë organizata ndërkombëtare. Kampin nuk mund ta konsiderojmë Guatenamo, kritikat vijnë edhe për shkak të politikës, kjo kuptohet. Ne kemi detyrë të thjeshtë, ne nuk harxhojmë në këtë marrëveshje. Dokumentari i Rai3 është normal, nuk kemi pse shqetësohemi. Në Shqipëri nuk funksionon dënimi për shpifjen. Dikush mund të thotë se filani ka vrarë 2 vetë, por duhet ta provosh. Edhe akuzat e emisionit RAI3 do të duhet të provohen. Rama bën gabim që kundërpërgjigjet”, tha Bushati.

Më tej, Zef Bushati komentoi edhe opozitën e vendit, duke thënë se PD e ka të keqen në radhën e vet. Sipas tij, PD duhet të bashkohet dhe të shpresojë të fitojë.

“PD të keqen e ka në radhët e veta. Sali Berisha nuk i njeh mirë njerëzit që ka afër, afron njerëzit që i kanë ikur. Edhe Lulzim Basha po e përçan partinë. Bashës nuk i shkon njeri në protestë. Për mua, derisa Berisha nuk ka akuzë, nuk është i dënuar. Ndërsa, Basha gaboi kur largoi Berishën, nuk mund t’i thuash personit tjetër ik ti se do vij unë, pasi një vend duhet ta meritosh”, deklaroi Zef Bushati.

(Arena e Lajmit)