Kandidati për drejtimin e konservatorëve thirrje qeverisë laburiste: Bazohuni te marrëveshja me Shqipërinë për emigrantët

Kandidati për të marrë drejtimin e konservatorëve në Britaninë e Madhe, Robert Jenrick, ka paraqitur plane për të ulur ndihmën e huaj për vendet që nuk pranojnë rikthimin e azilkërkuesve në vendet e origjinës.

Ish-ministri i imigracionit, një nga katër deputetët konservatorë që konkurron për të zëvendësuar Rishi Sunak, i kërkoi qeverisë laburiste të shkojë ‘shumë më tej’ në largimin e emigrantëve të paligjshëm.

Jenrick u bëri thirrje laburistëve që t’i japin fund ndihmave dhe të kufizojnë ashpër vizat për vendet që refuzojnë të bashkëpunojnë me Mbretërinë e Bashkuar për kthimet.

Ai pretendoi se planet e tij do të shihnin një rritje 5 fish të dëbimeve të njerëzve që jetonin ilegalisht në MB, deri në më shumë se 100000 largime në vit.

Ish-ministri tha gjithashtu se vende të tilla si Vietnami, Turqia dhe Brazili, të cilat kanë llogaritur dhjetëra mijëra kërkesa për azil gjatë viteve të fundit, duhet të shtohen në listën e kombeve ‘të sigurta’.

Kjo do të lejonte Britaninë të arrinte marrëveshje të reja me këto vende, të ngjashme me marrëveshjen e Sunak me Shqipërinë, në mënyrë që të përshpejtonte kthimin e emigrantëve të paligjshëm dhe kriminelëve të huaj, shtoi Jenrick.

“Migrimi i paligjshëm po ushtron presion të patolerueshëm mbi komunitetet tona dhe mbi taksapaguesit. Ndërsa numri i njerëzve që hyjnë ilegalisht është rritur gjatë 20 viteve të fundit, dëbimet kanë rënë ndjeshëm. Si ministër i imigracionit kam rritur largimet me mbi 50 për qind. Por ai sistem është i prishur – ne kemi nevojë për ndryshime thelbësore. Kushdo që vjen ilegalisht nga një vend i sigurt duhet të largohet menjëherë. Qeveria duhet të ndalojë vendet e tjera që të shfrytëzojnë bujarinë tonë duke vendosur kufizime të rënda të vizave dhe duke kufizuar ndihmën e huaj për vendet që nuk i marrin mbrapsht shtetasit e tyre këtu në mënyrë të paligjshme. Ne duhet të largohemi nga GJEDNJ [Konventa Evropiane për të Drejtat e Njeriut] që të mund të dëbojmë kriminelët e huaj të rrezikshëm. Dhe ne duhet t’i shpallim vende si Turqia, Brazili dhe Vietnami të sigurta në ligj – këto janë destinacione pushimesh, jo ferr të shkatërruar nga lufta. Kjo do të siguronte kufijtë tanë, do të mbronte publikun dhe do t’i kursente taksapaguesit dhjetëra miliarda paund në vitet në vijim”, tha ai.