Sot gjykata penale e Brukselit dha vendimin përfundimtar në gjyqin e gjerë të drogës “Sky ECC”. Në gjyq, 124 persona, katër kompani dhe një person i panjohur u përgjigjen për trafik të gjerë kokaine dhe marijuane.
Eridan Munoz Guerrero 51 vjec nga Vlora (ka mbiemrin e gruas kolumbiane), kreu i një rrjeti të gjerë të trafikut të drogës, është dënuar me 14 vite burg. 51-vjeçarit shqiptar i janë konfiskuar edhe pasuritë me vlerë 20 milionë euro.
“Kam qenë në krye të një organizate kriminale, kam marrë pjesë në trafik droge. Kam luajtur dhe kam humbur”, pranoi ai gjatë seancës së parë.
Në janar, prokurori publik kishte kërkuar 15 vjet burg për drejtimin e një organizate kriminale aktive në trafikun e drogës. Gjithashtu, 1 vit shtesë është kërkuar për posedimin e një arme dhe tre vjet për pengmarrjen e një të dyshuari tjetër, duke bërë gjithsej 19 vjet burg.
Mirëpo, avokatja e të dyshuarit, Nathalie Gallant, besonte se dënimi për klientin e saj duhet të ishte sa më i butë, pasi ai kishte bashkëpunuar me ligjin. Ajo kujtoi gjithashtu se vetë Eridan Guerrero ishte torturuar pas humbjes së mallit. “Ndërsa kjo nuk e ul rolin e tij si lider në Belgjikë, tregon se ai ishte përgjegjës ndaj palëve të treta dhe se ka njerëz mbi të”, argumentoi ajo.
Abdelëahab Guerni është dënuar me 17 vjet burg. 57-vjeçari algjerian konsiderohet si një nga drejtuesit e organizatës kriminale ndërkombëtare. Atij i janë konfiskuar 15 milionë euro pasuri. Abdelwahab Guerni u gjykua për importimin e drogës nga Amerika e Jugut dhe për menaxhimin e logjistikës së rrjetit të madh të drogës. Në seancën e fundit të 7 majit ai e pranoi pjesërisht fajin. “Isha unë që i solla të gjithë këtu,” tha ai, përpara se t’u kërkonte falje të bashkëpandehurve të tij. Avokatët e tij argumentuan se ai thjesht po ndiqte urdhrat e Eridan Guerreros. Thuhet se ai ka qenë thjesht një “ndërmjetës” në trafikun e drogës duke vënë në dispozicion librin e tij të adresave. Ai nuk do të kishte përcaktuar çmimet dhe as të rregullonte transportin.
Bilal I., një nga tre drejtuesit e organizatës, është dënuar me 15 vite burg. Ky 35-vjeçar banor në Bruksel njihej si një nga drejtuesit kryesorë të një organizate kriminale që qëndronte pas një rrjeti të gjerë ndërkombëtar të trafikut të drogës. Banorit të Brukselit i janë konfiskuar edhe 3 milionë euro pasuri. Ai ishte përgjegjës për importin e sasive të mëdha të kokainës nga Amerika e Jugut. Më pas ia shiti Eridan Guerreros, një tjetër drejtues i organizatës dhe organizatori i dosjes së drogës.
Avokati Sofian B., i cili u dha ndihmë kriminelëve, është dënuar me 40 muaj burg. Oficeri i policisë Bernard W. i cili informoi bandën u dënua me pesë vjet burg, dy prej të cilave u pezulluan dhe një gjobë prej 40.000 euro.
Gjatë zhvillimit të gjykimit, rezultoi se të paktën njëri nga të pandehurit ishte i lidhur gabimisht me çështjen, Mohamed R. “Prokurori publik ngatërroi Mohamed R. me një tjetër Mohamed R. Me përjashtim të një gërme, ata kanë të njëjtin mbiemër, por nuk janë të njëjtët njerëz”, argumentoi avokati i tij. Zyra e prokurorit publik federal e pranoi gabimin dhe kërkoi lirimin e personit.
Nga 124 të pandehur, vec drejtuesve kryesorë të grupit që u dënuan me 11-17 vjet burg, të tjerët do të shkojnë në burg nga 15 muaj deri në 15 vjet. Vetëm 9 persona u shpallën të pafajshëm. Në këtë proces u gjykuan edhe personazhe publikë por edhe ish-zyrtarë shtetërorë në Shqipëri. Përveç belgëve dhe shqiptarëve, të pandehurit e tjerë ishin kosovarë, kolumbianë, algjerianë, francezë, ukrainas etj.
Kjo dosje ka të bëjë me trafikun e gjerë ndërkombëtar të kokainës dhe marijuanës, i cili u çmontua nga policia belge në vitet 2021-2022, në bashkëpunim me ato të Italisë dhe Gjermanisë. U quajt “Encro” dhe “Sky ECC” sepse hetuesit u mbështetën kryesisht në dekriptimin e mesazheve “Encrochat” dhe “Sky ECC”, shumë të njohura nga trafikantët e drogës. Disa të pandehur përdorën pseudonime të shumta.
Droga transportohej përgjithësisht në kontejnerë nga Amerika e Jugut dhe Maroku, nëpërmjet portit belg të Antwerp, pika e parë e hyrjes në Evropë të kokainës, por edhe ato të Roterdamit në Holandë, Hamburgut në Gjermani dhe Le Havre në Francë, sipas prokurorisë. Prokuroria pretendon se ka identifikuar grupe të ndryshme kriminale aktive që prej vitit 2017, “të strukturuara, hierarkike ” dhe që paraqesin mes tyre “lidhje të paligjshme tregtare”.
Hetimi nisi në verën e vitit 2020 kur brigada e zjarrfikësve duhet t’i përgjigjet një zjarri në dukje të padëmshëm në një apartament në Bruksel. Pasi flakët janë shuar, zjarrfikësit dhe policët përplasen në një laborator të vogël kokaine. Në pamje të parë duket gjithçka veçse profesionale, por asgjë nuk është ashtu siç duket. Është nisja e një hetimi për atë që shumë shpejt rezulton të jetë organizata më e madhe e drogës në Belgjikë. Operacioni kryesor më pas u zhvillua më 21 tetor 2021, me kontrolle të njëkohshme në 114 vende në të gjithë Belgjikën, për të cilat u vendosën në dispozicion 1100 oficerë. Janë sekuestruar 32 ton kokainë dhe shuma të mëdha parash, por edhe prona, dhjetëra makina, armë dhe produkte luksoze. Edhe SPAK në Shqipëri ka sekuestruar asete të Eridan Guerreros. Një pjesë e parave të kësaj organizate rezulton të jenë transferuar apo investuar në Shqipëri.
and then