U kap duke marrë një pako me drogë me përqindje të lartë TCH, që ishte trafikuar nga SHBA përmes shërbimit postar, vihet në pranga 23-vjeçari

Policia e Tiranës ka finalizuar operacionin antidrogë të koduar “Dërgesa”, duke vënë në pranga një shtetas 23-vjeçar, banues në Tiranë, i identifikuar me inicialet M. M.

I riu u kap në flagrancë në një degë të Postës Shqiptare, teksa merrte një pako të ardhur nga Shtetet e Bashkuara të Amerikës, që përmbante rreth 475 gramë lëndë narkotike cannabis sativa me përqindje të lartë THC.

Hetimet disa mujore të zhvilluara nga Seksioni për Hetimin e Narkotikëve, në bashkëpunim me Forcën e Posaçme Operacionale dhe Policinë e Rinasit, çuan më tej në një kontroll të banesës së të arrestuarit. Aty u sekuestruan edhe 442 gramë të tjerë cannabis, një shumë e konsiderueshme parash, si dhe 7 celularë, që dyshohet se janë përdorur për komunikim të paligjshëm.

Në total, janë sekuestruar 917 gramë lëndë narkotike, me një vlerë të përafërt tregu prej 20 000 euro.

Materialet iu referuan Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për vijimin e procedurave penale.

Njoftimi i policisë:

Tiranë/Vijojnë operacionet e njëpasnjëshme kundër veprimtarisë kriminale të trafikimit të lëndëve narkotike.

U kap në flagrancë duke marrë një pako me lëndë narkotike cannabis sativa me përqindje të lartë TCH, që ishte trafikuar nga SHBA, nëpërmjet shërbimit postar, vihet në pranga 23-vjeçari.

Sekuestrohen 917 gramë cannabis sativa me përqindje të lartë TCH (me vlerë rreth 20 000 euro), një shumë e konsiderueshme parash dhe 7 celularë.

Seksioni për Hetimin e Narkotikëve, në bashkëpunim me Forcën e Posaçme Operacionale të DVP Tiranë, Komisariatin e Policisë Rinas dhe Filialin Qendra Tranzite e Postës Shqiptare, si rezultat i hetimeve disamujore të kryera në drejtimin e Prokurorisë pranë Gjykatës së Shkallës së Parë të Juridiksionit të Përgjithshëm Tiranë, organizoi dhe finalizoi operacionin policor të koduar “Dërgesa”.

Si rezultat i operacionit u arrestua shtetasi italian M. M., 23 vjeç, banues në Tiranë.

Ky shtetas u kap në flagrancë nga shërbimet e Policisë, në një degë postare, duke marrë një pako me rreth 475 gramë lëndë të dyshuar narkotike cannabis sativa me përqindje të lartë THC, që dyshohet se është trafikuar nga SHBA.

Më tej, gjatë kontrollit në banesën e tij, janë gjetur dhe sekuestruar 442 gramë lëndë e dyshuar narkotike cannabis sativa, një shumë e konsiderueshme parash dhe 7 celularë.

Materialet procedurale iu referuan Prokurorisë së Tiranës, për veprime të mëtejshme.