Në një kohë kur skuadra e Kukësit ka bërë jo pak ndryshime në merkato, një rebus më vete është edhe formacioni me të cilin do të luajnë verilindorët këtë sezon. Pritet që një pjesë e mirë e të afruarve në merkaton e kësaj vere të integrohen menjëherë në formacion, duke shpresuar që të ndërthuren ashtu siç pritet edhe me pjesën tjetër të lojtarëve.
Dilemat më të mëdha janë pa dyshim në mesin e fushës, aty ku nuk mungojnë alternativat, por gjithsesi e gjithë kjo periudhë përgatitjesh deri në startin e kampionatit, do t’i shërbejë teknikut Gega dhe stafit për të gjetur 11-tëshen ideale.
FORMACIONI MË I SHTRENJTË – Nëse ka dilema sa u përket titullarëve, “Panorama Sport” i bën një skaner formacionit më të shtrenjtë të verilindorëve, duke u bazuar në vlerat e lojtarëve në treg. Në total, 11 titullarët më të shtrenjtë kushtojnë së bashku 2 milionë e 775 mijë euro, ku më i shtrenjti kushton 300 mijë euro. Bëhet fjalë për katër lojtarë: portieri Angelo Tafas, vëllezërit Gjelbrim Taipi dhe Shqiprim Taipi, si edhe kroati Edi Basha.
Të tjerët vijnë pas tyre kanë vlera më të ulëta në treg. Sa i përket këtij formacioni, në portë është Tafas, Edison Ndreca dhe Ergys Peposhi nga krahët e mbrojtjes, ndërsa në qendër të saj Antonio Ilieski me Altin Bytyçin. Në mesin e fushës, përveç vëllezërve Taipi, krah tyre fiton një vend edhe Arbër Basha. Sa i përket sulmit, përpos Edi Bashës, është edhe kroati tjetër Ante Zivkoviç dhe Klejdi Daci. Skema është ajo 4-3-3, e cila faktikisht është edhe më e mundshmja që të luajë Kukësi i këtij sezoni. Megjithatë, nëse në letër këta futbollistë kanë vlerën më të madhe në treg, jo domosdoshmërisht do të jenë titullarët e Gegës, pasi në fund është fusha ajo që do të vendosë.
FAZA PËRGATITORE – Kukësi do të qëndrojë edhe pak ditë në vendin tonë, për të udhëtuar më 25 korrik drejt Turqisë, aty ku do të zhvillojë një fazë përgatitore, e cila pritet të zgjasë afërsisht dy javë. Gjatë kësaj periudhe verilindorët kanë programuar që të zhvillojnë disa ndeshje miqësore, me axhendën që nuk është bërë ende e ditur, por do të përballen me ekipet që aktualisht po përgatiten aty.
VLADIMIR MEMA – Arena e Lajmit
Loading…