Juventusi ka udhëtuar drejt SHBA për turneun veror, ku bardhezinjtë do të përgatitin një sezon nga i cili priten vetëm suksese. Klubi ka bërë lëvizje të rëndësishme në merkato duke afruar Pogba, Di Maria e Bremer për të zëvendësuar largimet e për të sjellë shumë cilësi në radhët e ekipit të drejtuar nga Masimiliano Alegri. Ndaj edhe ky i fundit nga Las Vegasi, ku gjendet aktualisht ekipi, ka pranuar se tashmë titulli është kthyer në një detyrim.
“Juventusi si gjithmonë niset për të arritur çdo objektiv, këtë verë kanë ardhur lojtarë të rëndësishëm, disa me eksperiencë e disa të rinj. Përveç të tjerave, është viti i dytë ndaj nisemi nga një bazë e mirë. Pasi kemi mbetur një vit pa trofe, për herë të parë pas 10 viteve, e kemi për detyrë të fitojmë titullin kampion”, theksoi trajneri në konferencën e parë amerikane.
“Di Maria dhe Pogba janë të jashtëzakonshëm, kemi një të ri si Gati dhe pastaj ka të tjerë të rinj që duhet të vlerësoj. Jam shumë i lumtur për afrimin e Bremer, lojtar fizik dhe me karakteristikat që kërkonim. Nuk ka shumë lojtarë në qarkullim të këtij niveli dhe klubi u tregua i aftë që të zëvendësonte menjëherë De Ligt. Jam i kënaqur, por tani nisin ndeshjet dhe vetëm një muaj na ndan nga fillimi i sezonit”, deklaroi Alegri para ndeshjes së parë të turneut amerikan, ndaj meksikanëve të Çivas Guadalahara.
Arena e Lajmit
Loading…