Tirana po bisedon me Vasil Shkurtajn, ndërsa ka në plan të prishë me konsensus kontratën me Devid de Silvën. “Panorama Sport” zbulon se këto janë të rejat më të fundit të merkatos së bardhebluve. 26 herë kampionët e Shqipërisë duan të bëjnë një rokadë të madhe në sulm. Të largojnë De Silvën me mirëkuptim dhe ta zëvendësojnë me Shkurtajn.
Burime të sigurta në klub tregojnë për gazetën se Tirana i ka bërë një ofertë zyrtare Shkurtajt dhe pret tashmë përgjigjen e vlonjatit. Ish-sulmuesi i Kukësit mbylli kontratën me verilindorët me shpresën për të vijuar karrierën jashtë vendit, por mund të bëjë një prapakthehu dhe të luajë sërish në Shqipëri.
E vetmja skuadër për momentin që mund të mbulojë edhe rrogën e shtatlartit të sulmit, duket se është Tirana. Për më tepër, 30-vjeçari shihet si lojtari ideal për të zëvendësuar largimin e Majkëll Ngosë dhe Devid de Silvës, i cili la një boshllëk jo të vogël në majën e sulmit.
Gjithsesi, mbetet për t’u parë se si do të shkojnë bisedimet, sepse dëshira e Shkurtajt është e madhe, ndërsa mundësia më e madhe është që të veshë fanellën bardheblu.
Sezonin e fundit Shkurtaj luajti 9 takime dhe shënoi një gol me fanellën e Kukësit.
DE SILVA – Te Tirana nuk janë të kënaqur me Devid de Silvën. Braziliani është një dështim i madh te Tirana dhe bardheblutë kërkojnë që t’i bëjnë ndryshe punët.
Në fakt, drejtuesit e Tiranës këto ditë kanë parë me kujdes se çfarë nuk shkon në skuadër. Janë bërë analiza të ndryshme, ndërsa natyrshëm ka nga ata që e kanë kaluar klasën dhe të tjerë që kanë mbetur e që janë një zhgënjim i madh.
Mësohet se drejtuesit e ekipit i kanë ofruar De Silvës mbylljen me mirëkuptim të marrëveshjes, gjithmonë nëse me Tiranën firmos Shkurtaj.
KAMPIONATI – Kuptohet që me këtë gjendje Tirana duhet të marrë lojtarë të tjerë. Në fillim është sulmi që duhet të plotësohet dhe më pas repartet e tjera.
Bomberi është emergjent, ndërsa duhet të zëvendësohet Totre dhe lojtarë të tjerë që mund të largohen. Problemi më i madh i Shehit është mbulimi i sulmit nëse largohet edhe Taulant Seferi.
OLSI AVDIAJ – Arena e Lajmit
