Ish-presidenti i Shqipërisë Ilir Meta rrëfeu në programin “Dola te Ola” historinë shumë interesante sesi një shemb në malin e Jezercës ka marrë emrin ‘Shkëmbi i Presidentit’.
Ai tha se një djalë që bën guida, i cili quhet Dardan, mori përsipër që ta çonte në malin e Jezercës. Ish-presidenti rrëfeu se ngjitja në Jezercë ishte shumë e vështirë dhe e rrezikshme, ndaj një pjesë e mirë e grupit nuk arritën që të ngjiteshin.
“Dardani ishte i jashtëzakonshëm, hipi në një shkëmb, diku 3-4 metra, dhe pas tij kishte humnerë”, tha Meta, teksa tregoi se më pas e kishte pyetur nëse edhe ai mund ta bënte një gjë të tillë.
Kreu i Partisë së Lirisë rrëfeu se me shumë vështirësi arriti të ngjitej në majë të shkëmbit, duke zbuluar se problemin më të madh e kishte hasur në zbritje.
Nga ajo ditë ai shkëmb në Jezercë quhet “Shkëmbi i Presidentit”.
Ish-presidenti Meta gjithmonë i ka ushtruar ecjet në natyrë, por në program ai ndau edhe pasione të tjera, siç janë volejbolli, shtanga, pingpongu, apo edhe futbolli, për të cilën më shumë spikat si një tifoz i zjarrtë.
Meta foli gjithashtu edhe për dashurinë që ka për kafshët, sidomos për macen e tij Sashën të cilën e konsideroi si pjesëtare të familjes.