Taulant Seferi, Enur Totre dhe Ardit Toli, tre ish-futbollistët e Tiranës kanë debutuar sot me fanellën e Vorskla Poltava në kampionatin ukrainas të futbollit. Të tre lojtarët kanë qenë pjesë e ndeshjes së javës së parë të kampionatit që skuadra e tyre luajti në transfertë ndaj Zoria Luhansk dhe e cila përfundoi me shifrat 3-1 për ekipin vendas.
Totre dhe Toli, të cilët kanë kohë që stërviten me skuadrën ukrainase, ishin titullarë në këtë sfidë, me mesfushorin nga Maqedonia e Veriut i cili u zëvendësua në minutën e 68 të ndeshjes. Pikërisht në atë minutë hyri në fushë Seferi, i cili e nisi ndeshjen nga stoli pasi kishte udhëtuar vetëm një ditë më parë drejt Ukrainës.
Shifrat në ato momente ishin 3-0 për ekipin vendas por Seferi u mundua të gjallëronte pak ofensivën me lëvizjet e tij. Falë një aksioni të sulmuesit erdhi edhe penalltia që u transformua saktësisht nga Olinik në minutën e 73-të. Por situata nuk ndryshoi më e kështu, Vorskla regjistroi humbje në javën e parë të kampionatit.
Ndërkohë, Realdo Fili luajti 50 minuta si titullar në ndeshjen që Çernomorets Odesa e tij humbi në shtëpi ndaj Veres Rivne me shifrat 0-1.
Arena e Lajmit
and then