Prestige po bëhet gati për një tjetër aventurë në Championsin e minifutbollit, event që do të mbahet nga data 1 deri më 4 shtatori në qytetin Herceg Novi të Malit të Zi. Në këtë kompeticion marrin pjesë 24 skuadra europiane të ndara në 6 grupe, ndërsa pasditen e sotme është edhe shorti i turneut.
Prestige, bënte pjesë në vazon 2, ndërsa goglat e kanë vendosur në Grupin A, ku do të ketë përballë këto ekipe: 7 Esima Patrioti (Sllovaki), SB Sabornog Hrama (Mali i Zi) dhe SIPA Sarajevo (Bosnjë-Hercegovinë). Në fazën me eliminim kualifikohen vendet e para dhe të dyta të secilit grup si dhe 4 vendet e treta më të mira.
Në këtë edicion të Championsit merr pjesë gjithashtu edhe një tjetër skuadër nga Shqipëria, ekipi ATS, që ishte pjesë e vazos 4 dhe u shortua në Grupin C me këto skuadra: Terra Trak (Bullgari), Todor Pet Bau (Hungari) dhe Liten Sarajevo (Bosnjë-Hercegovinë). Duke u rikthyer te Prestige, kujtojmë se kjo skuadër ka një eksperiencë disa vjeçare në Champions dhe është ekipi shqiptar që ka arritur rezultatet më të larta në këtë kompeticion.
Tre vite më parë Prestige ka mundur që të shkojë deri në gjysmëfinale. Ndërkohë për sa u përket rezultateve në arenën kombëtare, Prestige është tre herë kampion i Shqipërisë në futbollin me 6 lojtarë. Një herë kampion i Sunday League në futbollin me 9 lojtarë dhe gjithashtu një herë fitues i FSHF Cup, sërish në futbollin me 9 lojtarë. Përveç afrimeve të disa lojtarëve, Prestige në këtë edicion vjen me ndryshime në pankinë, teksa Eldi Topi dhe Mandrit Dule, janë rikthyer në ekip si trajner dhe ndihmëstrajner.
Grupi A
7 Esima Patrioti (Sllovaki)
Prestige (Shqipëri)
SB Sabornog Hrama (Mali i Zi)
SIPA Sarajevo (Bosnjë-Hercegovinë)
ARTIN LLESHAJ – Arena e Lajmit
and then