Thellohet përplasja publike mes kryeministrit Rama dhe ambasadores amerikane Yuri Kim, për çështjen e zgjedhjes së kreut të ri të SPAK dhe ecurinë e reformës në drejtësi.
Ishte kryeministri Rama i cili konfirmoi të martën para gazetareve qëndrimin për njoftimin e pazakontë të ministrisë së jashtme me 8 dhjetor, se për ambasadoren amerikane në Tiranë, Yuri Kim, ka nisur procedura e zëvendësimit.
Pas njoftimit të Ministrisë së Jashtme, vetë ambasadorja Kim reagoi fillimisht në një dalje publike gjatë një aktiviteti të Këshillit të Lartë Gjyqësor, duke deklaruar se qëndrimi i saj në Shqipëri do të jetë më i gjatë se mandati i saj 3-vjeçar. Ndërkohë që kërkoi që vendimet e institucioneve të Drejtësisë nuk duhet të çojnë në një kthim në të shkuarën.
Sipas Zërit të Amerikës komenti i saj tingëllon haptazi si një kambanë që bie përpara përzgjedhjes së kreut të ri të Prokurorisë së Posaçme kundër Korrupsionit dhe Krimit të Organizuar, ndërsa vjen një ditë pasi u takua me kryeministrin Rama. Ky i fundit me një “twitter” mëngjesin e së mërkurës avancoi me qëndrimin e tij kundër frymës së ambasadës amerikane duke deklaruar se Kreun e SPAK s’e zgjedh as qeveria, dhe as ambasada.
Reagimi i Ramës u bë pasi ambasadorja Kim e tha hapur se kreu i ri i SPAK nuk duhet të ndikohet nga ata që kanë interes për të kufizuar ose manipuluar hetimet.
E ndërsa Yuri Kim u ka bërë të qartë anëtareve të KLP se zgjedhja e kreut të SPAK nuk mund të ndikohet nga ata që kanë interes manipulimin e procesit, është Rama ai që i ka treguar kufijtë ambasadores amerikane, që përfaqëson vendin që i ka dalë garant dhe ka investuar më fort në hartimin dhe zbatimin e reformës në drejtësi. Zgjedhjet për kreun e ri të SPAK zhvillohen të premten më 16 dhjetor, dhe kandidatë janë prokurorët, Adnan Xholi, Altin Dumani dhe Edvin Kondili.