Sulmuesi i Barcelonës, Pier-Emerik Aubamejang u dhunua dhe grabit nga katër persona të armatosur, që hynë në banesën e tij.
Hajdutët i kanë thyer Aubamejang nofullën me shufër hekuri, sipas “ESPN”. Aubamejang u sulmua në orët e para të mëngjesit të së hënës kur grabitësit hynë në shtëpinë e tij të armatosur dhe me shufra hekuri.
Burime nga klubi fillimisht thanë se Aubamejang dhe gruaja e tij, të cilët u prangosën gjatë grabitjes në prani të fëmijëve të tyre, nuk kishin lëndime serioze.
Por “ESPN” raporton se sulmuesi ka thyer nofullën dhe do jetë jashtë lojës për rreth 3 javë, gjë që mund t’i shkaktojë komplikime në transferimin e përfolur tek Çelsi.
Barça dhe Çelsi zhvilluan bisedime të martën për një marrëveshje për Aubamejang dhe do të takohen sërish të mërkurën për të diskutuar një transferim të mundshëm.
Skuadra e Premierligës e ka bërë të qartë që në fillim se nuk dëshiron të paguajë mbi 20 milionë euro për sulmuesin, ndërsa Barça fillimisht po rezistonte për më shumë se 25 milionë euro.
Si ndodhi grabitja
Hajdutët hynë në kopsht dhe më pas brenda banesës së 33-vjeçarit në Castelldefels. Ata kërcënuan sulmuesin dhe gruan e tij Alisha Behage me armë dhe shufra hekuri.
Çifti raportohet se u prangosën dhe u lidhën. Aubamejang u godit në mjekër me një shufër ndërsa Alisha në kokë.
Ata i detyruan të shtriheshin në dysheme për një orë përpara fëmijëve të tyre, Kërtis, 11 vjeç dhe Pier, 6-vjeç.
Grabitësit detyruan 36-vjeçaren të hapte kasafortën e mbushur me sende të çmuara, përfshirë bizhuteri. Ata u larguan nga rezidenca e asit të Barcelonës me një “Audi A3” të bardhë.
Alisha denoncoi ngjarjen në polici dhe kanë nisur hetimet.
Arena e Lajmit