Kategoria e Parë nisi me zhurmë dhe çfarë zhurme… Pa frikë mund ta themi që do të jetë një ndër kampionatet më interesante të të gjitha kohërave, ashtu sikundër u parashikua. Këtë e kuptuan që në start. Dhe të sqarohemi, nuk po i referohemi vetëm asaj që u prodhua në fushë.
Nuk është se pati spektakël dhe goleada, por surprizat nuk munguan. “Të mëdhatë” dëshmuan se nuk janë të pakalueshme, ndërsa “të voglat” ditën të befasojnë. Ia dolën pa bërë blerjet e bujshme dhe pa atë pompozitetin e milionerëve. Java e parë solli edhe ndryshime në stol. E pësoi i pari trajneri, pas vetëm 90 minutash lojë. Dhe iku me akuza të forta për ndërhyrje. Skuadrat ishin “kursimtare” edhe në gola, pasi në total u shënuan vetëm shtatë. E megjithatë, pati një të mirë. Nuk pati tensione dhe probleme me gjykimin, edhe pse tashmë ka kaq klube me histori të përfshira, problematika me infrastrukturën mbetet e njëjtë. Vetëm gjashtë ndeshje u luajtën mes së shtunës dhe të dielës, pasi Lushnja-Burreli u anulua.
Fusha nuk ishte gati dhe federata për çudi mendoi që t’i jepte kohë, kur fare mirë mund ta kishte “urdhëruar” ekipin pritës të sajohej diku tjetër. Vetëm Dinamo e nisi bindshëm garën, por e njëjta gjë nuk mund të thuhet për Flamurtarin dhe Skënderbeun. Kryeqytetasit likuiduan Orikun në “Selman Stërmasi”, me gola të Sabien Lilajt dhe Taulant Markut. Të besuarit e Nevil Dedes treguan direkt ambicie, ndonëse kjo me orikasit e sapongjitur, nuk mund të quhet prova e vërtetë. Vlonjatët morën një tronditje të fortë prej Luzit 2008, që pa frikë mund të quhet edhe skuadra e javës. Debutues në Kategorinë e Parë, ata përmbysën kuqezinjtë.
Edhe pse Kamargo Iakovelli dha avantazhin në të 49-ën, Foti Çuçka dhe Ilirjan Dushaj kthyen gjithçka për 3 minuta (79’ dhe 81’). U shtangën edhe korçarët nga Tërbuni, ndonëse pa gjë nuk dolën nga Puka dhe e morën një pikë. Albi Xhebrahimi për pak sa nuk u dha fitoren vendësve, por një penallti “shpëtoi” bardhekuqtë e Migen Memellit dhe Vangjel Zguro nuk mund ta falte barazimin. Tri takimet e tjera u mbyllën ashtu siç nisën: në “thatësi” të plotë. Problem me golin pati në Korabi-Apolonia. Ndonëse rastet nuk munguan, askush nuk festoi dot.
As prezenca e Arenda Dukës në tribunë nuk i “nxiti” lojtarët e të dyja skuadrave që të çonin topin drejt rrjetës. E njëjta histori edhe në BesaTomori. U luajt një “Klasike” e vërtetë në stadiumin e Peqinit dhe volumi nuk është se mungoi, por finalizimi la për të dëshiruar. Turbina-Besëlidhja, po ashtu u fiksua te “X”- i. Transformimi nga merkatoja, bëri që lojtarët të mos lidheshin dot si duhet në fushë. Cërrikasit ishin vërtetë më kërkues, por një herë shtylla dhe në disa raste pritjet e Elson Demit iu kthyen në makth.
Arena e Lajmit