Fitorja e javës së katërt ndaj Partizanit me rezultatin 0-1 e gjen Erzenin në vendin e dytë në klasifikimin e Kategorisë Superiore, pa asnjë humbje dhe pa asnjë gol të pësuar.
Këtë start të shijakasve shumë pak mund ta kishin imagjinuar, por ja që kampionati shqiptar dhuron dhe nga këto surpriza të bukura. Momentalisht në ligat e para europiane vetëm katër ekipe nuk kanë pësuar akoma gol. Ata janë: Koniaspor (Turqi), Istanbul Basaksehir (Turqi), Dnipro (Ukrainë) dhe Erzeni (Shqipëri).
FANELLA – Interesant është fakti se ekipi i Erzenit i ka zhvilluar të gjitha ndeshjet me uniformën e dytë me ngjyrë të bardhë dhe jo blunë karakteristike. Mesa duket ngjyra e bardhë është fatsjellëse për shijakasit.
Statistika motivuese dhe me mjaft vlerë për repartin difensiv të Erzenit, që si duket janë një mur i pathyeshëm për cilindo kundërshtar në këto javë të para të kampionatit. Atmosfera në qytet dhe te futbolldashësit shijakas është mjaft e zjarrtë dhe në çdo ndeshje prezenca e tyren në stadiume rritet akoma më shumë.
STËRVITJA – Këto dy ditë, ekipi ka zhvilluar seanca të lehta me grupe të ndryshme lojtarësh, ku disa prej tyre po pushojnë për të qenë të gatshëm fizikisht për sfidën e radhës ndaj Laçit, e cila zhvillohet ditën e shtunë, në 17:45, në stadiumin “Niko Dovana” të Durrësit.
Ekipi i Laçit vjen pas 3 humbjeve radhazi dhe do të kërkojë të bëjë kthesën, ndërsa Erzeni gjendet në një formë të mirë rezultatesh dhe pritet ta vijojë këtë sukses para tifozërisë së tyre, teksa luan si vendës, por gjithashtu të kthejë faqen e historisë, pasi në dy takimet e zhvilluara ndërmjet tyre 20 vitet e fundit Erzeni është mundur 2 herë me shifrat 2-1 në Laç dhe 0- 2 në Shijak, ndeshje të vlefshme për Kategorinë e Parë të sezonit 2007-2008.
Në një miqësore të zhvilluar në Shijak si një test para se të fillonte kampionati, Laçi do të fitonte 0-2 në “Tofik Jashari”, por shijakasit asokohe nuk ishin kolauduar akoma dhe do të tregojnë me shumë mundësi një fytyrë tjetër të shtunën.
RONALD FAJA – Arena e Lajmit
NDIQE LIVE “PANORAMA TV”
and then