Ministrja e Arsimit Evis Kushi në përfundim të mbledhjes së Këshillit të Ministrave, u ndal te skema e punësimit të detyrueshëm për studentët e mjekësisë.
Kushi bëri me dije se kjo nismë do të hyjë në Kuvend në korrik me procedurë të përshpejtuar për shkak të emergjencës.
Gjithashtu ajo nënvizon se megjithatë është parashikuar se nëse për një vit studentëve nuk u gjendet punë në institucionet përkatëse në Shqipëri, ata mund të tërheqin diplomën.
“Studentët e vitit të parë , apo më saktë kandidatët për studentë, përpara regjistrimit, ata që shpallen fitues, përpara regjistrimit në universitet do të nënshkruajnë një marrëveshje me UMT me MAS dhe MSHMS për tu angazhuar që do të qëndrojnë 5 vite për punësim pas diplomimit të tyre në Shqipëri, në institucionet tona shëndetësore dhe diplomën do ta tërheqë pas përmbushjes së këtij detyrimi. Ndërkohë që për studentët që janë aktualisht në sistem, nga viti i dytë deri në vitin e gjashtë, përsëri në fillim të këtij viti akademik do të nënshkruhet një marrëveshje ku angazhohen që do të qëndrojnë përkatësisht: studentët nga viti i dytë deri në vitin e katërt, tre vite, ndërsa studentët e vitit të pestë dhe të gjashtë, dy vite, punësim në Shqipëri.
Dhe diploma përsëri tërhiqet pas përmbushjes së këtij detyrimi. Studentëve që janë aktualisht në sistem, do tu ofrohet edhe mundësia që nëse nuk janë dakord të nënshkruajnë marrëveshjen, të paguajnë sa ç’është kostoja reale e çdo viti akademik, sigurisht për vitet e mbetura akademike, jo për vitet që tashmë kanë kaluar. Pra ky është detyrimi që kanë studentët e vitit të parë nuk kanë të drejtë zgjedhjeje, por do që qëndrojnë për 5 vite. Pra duhet t’i bëj thirrje të gjithë kandidatëve, të gjithë ata që kanë vendosur të studiojnë për programin Mjekësi e Përgjithshme, duhet ta mendojnë që nëse zgjedhin të studiojnë në universitetin shtetërore, duhet të nënshkruajnë këtë marrëveshje dhe kanë detyrimin pesë vite të qëndrojnë të punësohen në Shqipëri. Ndërsa studentët e tjerë mund të zgjedhin mes dy alternativave. Sigurisht që qëllimi ynë është që të gjithë studentët nga viti i parë deri në vitin e gjashtë të qëndrojnë të punojnë, të japin kontribut për vendin, sepse në fund të fundit ky është një detyrim që e kemi për të gjithë, për të plotësuar nevojat që kemi për mjekë.
Për sa i takon specializimeve, këto në rast se janë të pambuluara nga MSHMS, pra nëse specializantët e paguajnë vetë kuotën, tarifën, do të konsiderohet periudhë punësimi, ndërsa në rast se është e mbuluar nga MSHMS, sigurisht që ata nënshkruajnë një marrëveshje me MSHMS përpara specializimit, kështu që kanë detyrimin të përmbushin ato detyrime që tashmë janë në fuqi.
Ndërkohë dua të theksoj që nëse për një vit nuk arrihet të plotësohet detyrimi për punësimin e tyre, atëherë të gjithë studentët, të diplomuarit do të lirohen nga ky detyrim dhe do të tërheqin diplomën e tyre.
Trajtimi i veçantë konsiston në dy drejtime kryesore. Së pari punësim prioritare në institucionet shëndetësore shqiptare dhe së dyti përfshirje në programet sociale të punësimit. Por e theksoj edhe një herë që nëse nuk do të arrihet, gjë që nuk mund të ndodhë, por gjithsesi kjo do të jetë pjesë e marrëveshjes, nëse për një vit nuk plotësohet detyrimi për një punësim të sigurt, atëherë këta të diplomuar, mjekë do të lirohen nga detyrimi dhe do të marrin menjëherë diplomën. Dua të theksoj që ky projektligj për shkak të emergjencës do të prezantohet në Kuvendin e Shqipërisë me procedurë të përshpejtuar sepse në muajin gusht, siç e dini, të gjithë ata maturantë që duan të studiojnë programin Mjekësi e Përgjithshme, kanë provimin shtesë të digjitalizuar që do të zhvillohet në muajin gusht pranë Qendrës së Shërbimeve Arsimore.
Kështu që ne duhet ta miratojmë brenda korrikut këtë projektligj, në mënyrë që ata përpara se të marrin vendimin dhe përpara se të bëjnë provimin, t’i dinë, t’i njohin të gjitha kushtet që do të kenë për sa i takon këtij programi”, thotë Kushi.
Ndërsa ministrja e Shëndetësisë, Ogerta Manastirliu tha se kushti i vendosur nga qeveria është që të shtohen burimet njerëzore në vend dhe numri i mjekëve të cilët përfundojnë arsimin, ku shtoi se ministria e Shëndetësisë ka shtuar dhe numrin e kuotave të pranimeve në universitet.
Sakaq shtoi se penalitetet në rast se nuk zbatohet kontrata me qeverinë do t’i parashtrohen studnetëve para se ta firmosin dhe të regjistrohen në universitet.
“Ne duhet të rrisim numrin e mjekësve por jemi ende larg nga mesatarja e vendeve të rajonit, pra përballemi me shumë sfida. Ne e dimë mirë sesi sot vendet po liberalizojnë vendet e punës, pasi vendet e zhvilluara po thithin shumë profesionistë. Shqipëria është ndër vendet e para të rajonit për numrin e lartë të largimeve, kemi ndryshimet demografike ne duhet të ruajmë burimet njerëzore në vend. Interesi më i lartë i qytetarëve është ai për shëndetin mjekësor, ndaj dhe ne kemi parë mundësitë sesi të ndërtojmë një ligj që ti japë studentëve disa trajtime që ata të mundësojnë qëndrimin në vend, duke u punësuar.
Të gjithë studentët që do të lidhin marrëveshje me ministrinë e mjekësisë do ti mundësohet punësim, të përfitojnë pas punësimit politikën e strehimit social dhe më pas të drejtën e specializimit. Detyra jonë është të sigurojmë trajtim mjekësor, do të rrisim numrin e kuotave të pranimit, deri në 500 që të kemi më shumë mjek të diplomuar. Studentët pas diplomimit do të kenë mbështetje të shtetit. Marrëveshja është pjesa e dytë që parashikon ky akt, ku do të ketë firmosje të gjithë kushteve”, tha ajo.
and then