Nga 10 kg heroinë për rrugë, nis gjyqi për 18 shqiptarë në Francë të akuzuar për trafik droge nga Holanda

18 shqiptarë, mes të cilëve 5 ende në kërkim, do të gjykohen në Rennes të Francës për trafik ndërkombëtar heroine. 3 persona, mes të cilëve edhe drejtuesi i rrjetit, të moshës 24 deri në 50 vjeç, janë vendosur në paraburgim dhe 10 të pandehur nën mbikëqyrje gjyqësore. Ata përballen me një dënim me 10 vjet burgim, të dyfishuar në rast të përsëritjes së veprës penale, dënime të rënda për dëmshpërblim dhe gjoba doganore dhe konfiskim të pasurisë së tyre. Seanca e tyre do të zhvillohet nga e hëna 29 janar 2024 deri të premten më 9 shkurt 2024 pranë gjykatës penale.

Gjatë shtatorit 2018, informacioni gjyqësor ka mbërritur në shërbimet e policisë në Ille-et-Vilaine për një individ me kombësi shqiptare, 45 vjeç dhe me histori të mëparshme.

Disa muaj më vonë, në korrik 2019, u hap një hetim paraprak nga prokurori publik i juridiksionit të specializuar ndër rajonal të Rennes për trafik droge, trafik njerëzor në banda të organizuara dhe konspiracion kriminal. Elementët e parë konfirmuan ekzistencën e trafikimit. “Kjo është orkestruar nga shtetas shqiptarë të vendosur në territorin francez, në lidhje me rrjetet lokale, veçanërisht në Ille-et-Vilaine dhe në rajonin e Nicës,” shpjegon prokurori publik, Philippe Astruc.

Ky rrjet, duke funksionuar në mënyrë klanore, furnizohej rregullisht me drogë, kryesisht heroinë, në Holandë, duke përdorur lidhjet rrugore me një normë rreth 10 kilogramë për udhëtim. “Organizata kriminale përdorte edhe telefona dhe automjete të dedikuara. Ajo kishte zbatuar një qark për pastrimin e fondeve nga rishitja e produkteve”.

Në datat 29 dhe 30 mars 2021, forcat e rendit arrestuan 17 anëtarë të kësaj organizate, mes të cilëve 16 burra dhe një grua, të moshave nga 19 deri në 57 vjeç.

Gjatë kontrolleve të organizuara në Rennes dhe Ille-et-Vilaine u zbuluan lëndë narkotike si 2,5 kg heroinë, 60 kg produkte prerëse, më shumë se 50 mijë euro para cash, 4 pistoletë me municionet e tyre, 2 automjete, mes tyre një Mercedes C. Gjithashtu u sekuestrua një automjet, i destinuar për të transportuar lëndë të paligjshme”.