Roma është kualifikuar për në fazën tjetër të Europa League, pasi eliminoi Feyenoord me penallti. Ashtu si ndeshjen e parë, edhe takimi i dytë përfundoi 1-1, me fatin e sfidës që u vendos vetëm nga 11-metërshat. Nën prezencën e 67,293 tifozëve, ndeshja nisi me ritëm të lartë. Gimenez realizoi në portën e skuadrës italiane që në minutën e pestë, gol për t’u cilin u desh edhe verifikimi nga ana e VAR. Një goditje perfekte nga distanca e Pellegrinit “shkundi merimangat” e portës holandeze, në minutën e 15-të. Të besuarit e De Rossit shtuan presionin dhe në të 37-tën ishte Karsdorp që provoi të përmbysë ndeshjen, por topi shkoi mbi traversë. Pjesa e dytë nuk prodhoi gol, me skuadrat që iu drejtuan shtesës e më pas penalltive.
Nga pika e bardhë e penalltisë, Roma u tregua më e saktë, ku i vetmi që gaboi ishte Lukaku. Në krahun tjetër, Feyenoord paguan shtrenjtë gabimet e Jahanbakhsh dhe Hartman.
Në ndeshjet e tjera, Sporting bën detyrën, teksa sonte nuk e vendosi aspak në diskutim kualifikimin. Portugezët fituan 3-1 në aktin e parë ndaj Young Boys, ndërsa sonte në Estádio José Alvalade (Lisbon), takimi përfundoi 1-1.
Super-triumf i Spartës së Pragës ndaj Galatasaray me shifrat 4-1 në Pragë, duke bërë kështu të pavlefshme fitoren 2-3 të turqve në sfidën e parë. Te skuadra çeke, lojtari shqiptar Indrit Tuci ishte protagonist me gol dhe asist, ndërsa ndeshje të mirë luajti edhe Qazim Laçi. Shorti i Europa League do të hidhet të premten, me skuadrat që do të mësojnë kundërshtarët në fazën tjetër.
(J.S/)
and then