Mbretëresha Elizabeth II shënon një tjetër rekord në historinë e saj

Mbretëresha është bërë monarkja e dytë sovrane me shërbimin më të gjatë në histori.

Që nga e hëna, ajo ka qëndruar në fron për 70 vjet e 127 ditë, e dyta pas Louis XIV të Francës, i cili u bë mbret në moshën 4-vjeçare. Ajo kaloi mbretin e Tajlandës, Bhumibol Adulyadej, i cili vdiq në vitin 2016, duke barazuar mbretërimin e tij të dielën.

Fundjavën e kaluar, Jubileu Platinum i 96-vjeçares u shënua me katër ditë festimesh në të gjithë Mbretërinë e Bashkuar. Ajo kishte mbushur zyrtarisht 70 vjet sundim më 6 shkurt.

Nëse Mbretëresha vazhdon të mbretërojë në maj të 2024-ës, ajo do të merrte titullin e monarkut më jetëgjatë të një shteti sovran. Mbretërimi i Louis XIV prej 72 vjetësh e 110 ditësh ishte nga 1643 deri në 1715. Por ai filloi të sundonte personalisht vetëm në të 20-at e tij, në 1661.

Mbretëresha u bë monarke në moshën 25-vjeçare, pas vdekjes së babait të saj në orët e para të 6 shkurtit 1952. Në shtator 2015, ajo u bë monarkja britanike me mbretërimin më të gjatë, kur e kaloi mbretërimin e stërgjyshes së saj, Mbretëreshës Victoria.

Ajo tha në atë kohë se ky nuk ishte një titull të cilin e kishte aspiruar ndonjëherë. Ajo gjithashtu u bë monarkja femër më jetëgjatë në historinë botërore në atë ditë. Të dhënat e saj të tjera përfshijnë të qenit mbretëresha më e vjetër në fuqi dhe monarkja më e vjetër britanike ndonjëherë.

Mbretëresha, e cila ka kohëve të fundit ka pasur disa probleme shëndetësore, ka marrë më pak detyra zyrtare kohët e fundit, me anëtarët e familjes së saj – veçanërisht Cambridges dhe Princi Charles dhe Camilla – duke marrë një rol më të spikatur.

Ajo ka gëzuar shumë njerëz duke u shfaqur në ballkonin e Pallatit Buckingham gjatë fundjavës jubilare dhe ende nuk dihet se kur do të shfaqet në publik në vijim. Një rast mund të jetë Royal Ascot, një ngjarje e preferuar e Mbretëreshës kuajdashëse që po zhvillohet këtë javë.

Në mbyllje të fundjavës jubilare, ajo tha në një letër falënderimi për publikun britanik se ishte “e përulur dhe e prekur thellë” nga numri i njerëzve që kanë festuar përkrah saj.