Procesi i integrimit, Varhelji: Pritet të hapet grupi i parë i kapitujve të negociatave për Shqipërinë

Komisioneri Evropian për Fqinjësinë dhe Zgjerimin, Olivér Várhelyi, tha se është në interes të Bashkimit Evropian që zgjerimi të ndodhë së shpejti.

Ai foli sot në forumin “BE takohet me Ballkanin” në Sofje, njoftoi agjencia bullgare e lajmeve BTA.Várhelyi tha se konteksti gjeopolitik ka ndryshuar vitet e fundit. Krahas luftës ruse në Ukrainë, aty pranë ka edhe një tjetër konflikt, si dhe kriza Covid. Vendet afër kufijve të BE-së janë më të prekura nga këto kriza.

Várhelyi theksoi se politika e zgjerimit i referohet investimeve të qarta gjeopolitike.

“Fqinjët e BE-së janë partnerët e saj afatgjatë për paqen dhe prosperitetin – kështu e shohin ata anëtarësimin e tyre, por kështu BE-ja duhet ta shohë edhe rolin e zgjerimit.

Reformat e nevojshme duhet të kryhen së bashku për të përshpejtuar procesin e pranimit të çdo vendi, tha komisioneri i zgjerimit. Ai gjithashtu theksoi se është e rëndësishme që secili vend të respektojë obligimet e veta.

Komisioni aktual Evropian e filloi mandatin e tij me tre vende kandidate dhe tani janë nëntë. Tre vendeve iu dha drita jeshile për të hapur negociatat e pranimit. Tani ekziston një agjendë e qartë për të përshpejtuar integrimin real. Kjo do të thotë tejkalim i hendekut ekonomik”, tha komisioneri.

“Komisioni i ardhshëm Evropian duhet të mirëpresë anëtarët e rinj të BE-së. Mali i Zi tashmë ka arritur në fazën përfundimtare, që nënkupton mbylljen e kapitujve të negociatave; qeveria e re e vendit po përmbush detyrimet e saj”, tha Várhelyi.

“Pritet që për Shqipërinë të hapet grupi i parë i kapitujve të negociatave. Sa i përket Serbisë, negociatat për anëtarësim duhet të vazhdojnë”, komentoi ai”.

Takimi i BE-së me Forumin Ballkanik organizohet nga Forumi Liberal Evropian, partia ALDE dhe Klubi Atlantik i Bullgarisë, me mbështetjen e Ministrisë së Jashtme Bullgare.