Policia Kombëtare Spanjolle, në bashkëpunim me Policinë Vendore të Castellar del Vallès, në Barcelonë, ka çmontuar një organizatë kriminale shqiptare të dedikuar për kultivimin dhe trafikimin e marijuanës. Në total, janë bërë 9 arrestime dhe janë sekuestruar më shumë se 2000 bimë marijuanë në faza të ndryshme rritjeje dhe 260 kilogramë sytha droge në procesin e tharjes, të gjitha të fshehura në dy magazina në këtë komunë të Vallès Occidental.
Hetimi nisi pas një denoncimi nga kompania elektrike e zonës, e cila konstatoi se në këto dy magazina konsumi i energjisë ishte shumë më i lartë se sa pritej në objekte të këtij lloji. Teknikët dyshuan se ata mund të strehonin plantacione marijuanë në shtëpi, dhe ia komunikuan këtë teori agjentëve. Nga komisariati i Sabadellit nisën një hetim që kishte edhe ndihmën e grupit Special Drone Systems të Shtabit të Policisë Kombëtare.
Pasi u bënë kontrollet përkatëse dhe u sigurua se në ato magazina po rritej vërtet marijuanë në sasi të mëdha, nisi hetimi i cili zbuloi se brenda saj rriteshin 2111 bimë të kësaj droge dhe 260 kg sytha. Gjatë hetimeve u konstatua gjithashtu se trafikantët kishin mashtruar kompaninë e furnizimit me energji elektrike në mes të dy magazinave për një shumë prej 724.208 euro. Teknikët kanë mundur të rivendosin rrjedhën normale elektrike në zonë, duke shmangur një zjarr të mundshëm për shkak të mbingarkesës.
Operacioni kulmoi me arrestimin e 9 personave me kombësi shqiptare të cilët u vunë në dispozicion të Gjykatës së Hetimit në detyrë, e cila për 4 prej tyre vendosi burgim provizor dhe për pjesën tjetër lirim me akuzë.
(Arena e Lajmit)
and then