Gazetari Ervis Kuçi në një raportim live për News24 nga autostrada Levan-Tepelenë ka zbardhur disa detaje sa i përket aksidentit të rëndë me tre viktima dhe tre të plagosur që ndodhi në orët e vona të mbrëmjes së djeshme.
Aksidenti ka ndodhur në afërsi të fshatit Buzëmadh dhe viktimë mbeti drejtuesi i mjetit “Ford”, Sokrat Lelaj së bashku me bashkëshorten Fatbardha Lelaj, dhe vjehrrën e tij Bylyre Salaj.
Sipas gazetarit përplasja me automjetin tip “Opel” që drejtohej nga Mariglen Skënderaj, i cili udhëtonte me bashkëshorten dhe vajzën 6 vjeçe, ka qenë tepër brutale.
Policia e Fierit ka arrestuar sot drejtuesin e “Opelit”, ndërsa familjarët e tij ndodhen ende në spitalin rajonal ku janë duke u trajtuar me ndihmë mjekësore.
“Mësohet se aksidenti ka ndodhur në një kohë kur zona ka pasur rreshje shiu dhe ka qenë e lagur dhe pandriçuar. Nuk hidhet poshtë edhe mundësia e një parakalimi të gabuar. Fatbardha ka mbërritur në gjendje kome në spitalin e Fierit dhe ka ndërruar jetë 60 minuta pasi u dërgua aty. Janë marrë kamerat e sigurisë së bizneseve për të parë lëvizjen e dy automjeteve para se të ndodhte aksidenti, nëse ishin duke lëvizur me shpejtësi të madhe”, raportoi Kuçi.
Ai gjithashtu theksoi se gjatë ditës së sotme është vënë re lëvizja e automjeteve me shpejtësi në këtë aks por edhe prezencë e lartë e forcave të policisë. Ndërkohë BalkanWeb ka arritur të sigurojë fotot e viktimave, familjarët e të cilëve kanë hapur sot dyert e mortit.
and then