Me Hansi Flick dhe me Robert Lewandowski-n në anën e tyre, Barcelona “hakmerret” ndaj Bayern Muich, i shkaktoi një humbje me “poker” golash në një sfidë spektakolare ku Raphinha ishte njeriu i ndeshjes, autor i një “triplete”.
Braziliani gjeti rrugën e rrjetës që në minutën e parë, në topin e parë që i erdhi në këmbë shtriu edhe Neuer duke kaluar Barçën në avantazh. Bayern reagoi fuqishëm, Harry Kane me kokë barazoi menjëherë shifrat, por gjyqtari i takimit anuloi gjithçka për pozicion jashtë loje. Në minutën e 18-të, Harry Kane i shërbyer nga Gnabry dërgoi sërish topin në rrjetë, por këtë herë u vlerësua në pozicion të rregull duke barazuar shifrat në 1-1.
Ekipi i Flick ishte perfekt në këtë takim, pasi goditën 4 herë kuadrat duke shënuar 4 gola. Në minutën e 36-të ishte radha e Lewandowskit i cili i shërbyer nga Fermin Lopez e kishte të lehtë të shtynte topin në rrjetë. Barça nuk u mjaftua me kaq, por në fundin e pjesës së parë, Raphinha realizoi edhe golin e tretë, të dytin personal.
Historia nuk ndryshoi as në pjesën e dytë, madje as protagonistët, pasi Raphinha kompletoi mbrëmjen e tij perfekte duke realizuar një “tripletë” golash. Me Bayern Munich që e kishte të vështirë të reagonte, Barça administroi si duhet pjesën e mbetur të ndeshjes duke i lëshuar një sinjal të qartë Real Madrid, “El Clasico” e kësaj fundjave pritet të jetë spektakolare.
“Recital”, ishte titulli i përbashkët i përzgjedhur nga dy të përditshmet pranë Barcelonës, Mundo Deportivo dhe Sport.
()
and then